Në periudhën prill-qershor 2022 shpenzimet kapitale në Kosovë kanë qenë vetëm 51.3 milionë euro, apo përreth 28% më pak se në periudhën e njejtë të vitit 2021. Kështu thuhet në raportin e Bankës Qendrore të Kosovës (BQK) me titull: Vlerësimi tremujor i ekonomisë, raporton portali Front Online.
Sipas këtij raporti, gjatë tremujorit të dytë të këtij viti, shpenzimet kapitale përbënin vetëm 9.7 përqind të gjithsej shpenzimeve buxhetore, derisa në periudhën e nejtë të vitit 2021 ishin rreth 15%.
Përdallim nga shpenzimet kapitale që ishin shumë të ulëta në këtë periudhë, kategoria kryesore që kontribuoi në rritjen e shpenzimeve buxhetore ishte ajo e shpenzimeve rrjedhëse, të cilat në TM2 2022 ishin 477.9 milionë euro apo 16.7 për qind më të larta krahasuar me TM2 2021.
“Në kuadër të shpenzimeve rrjedhëse, subvencionet dhe transferet shёnuan rritje prej 40.8 pёrqind dhe arritën vlerёn 235.9 milionё euro”, bëhet e ditur në këtë raport.
Edhe shpenzimet qeveritare për mallra dhe shёrbime (pёrfshirë edhe shpenzimet komunale) shënuan rritje prej 3.6 përqind dhe arritën vlerën 77.4 milionë euro, ndërsa shpenzimet pёr paga shёnuan rёnie prej 1.7 pёr qind dhe arritën vlerёn 164.6 milionё euro, raporton Front Online.
