Në seancën e sotme në Gjykatën Themelore në Ferizaj, është mbajtur shqyrtimi gjyqësor, ndaj Naser Pajazitajt, i cili po akuzohet për vrasjen e Donjeta Pajazitajt. Në këtë seancë, u dëgjua në cilësi të dëshmitares gruaja e të akuzuarit, Dushe Pajazitaj.
Në këtë fazë të procedurës, dëshmitarja Dushe Pajazitaj deklaroi se mbetet në tërësi pranë deklaratave të saja të dhëna në prokurori, polici dhe në shqyrtimin gjyqësorë në Gjykatën e Pejës. Ajo ka theksuar se tjetër nuk ka se çfarë të shtoi, ndërsa për arsye të problemeve të saja shëndetësore tanimë të njëjtës nuk i kujtohej qartë ngjarja dhe ndodhit e së kaluarës.
Më pas dëshmitarja në pyetjet vijuese të prokurores Valbona Disha Haxhosaj, deklaroi se e njihte familjen e Halil Pajazitaj, ku me të njëjtit kishte vizita të arsyeshme familjare, po ashtu shtoi se vajza e saj Violeta shoqërohej me tani të ndjerën Donjeta Pajaziti.
Seanca e radhës është caktuar për të nesërmen më 18 dhjetor 2020 ora 10:00.
Sipas aktakuzës së ngritur më 08.06.2017 nga prokurorja e shtetit Valbona Disha Haxhosaj, ai po dyshohet se më 09 nëntor 2015, në bjeshkët e Strellcit Komuna Deçan e pikërisht në vendin e quajtur te “Kroni i Lajthisë“, i pandehuri edhe pse më parë ka qenë i dënuar për vrasje, me dashje dhe me armë dhe atë revole të tipit të panjohur në mënyrë mizore e ka privuar nga jeta viktimën Donjeta Pajazitaj nga po i njëjti fshat, në atë mënyrë që derisa viktima ditën kritike ka qenë duke shkuar në punë në këmbë së bashku me axhën e saj dhe kur kanë arritur tek bunari i fshatit janë ndarë, ashtu që viktima ka vazhduar rrugën në drejtim të Strellcit të Epërm dhe kur afrohet përafërsisht 150 metra afër shtëpisë së Nedi Jusaj, aty pari kalon i pandehuri Naser Pajazitaj me veturën e tij të tipit xhip sheroke me ngjyrë të kaltër i cili ndalet e merr viktimën me veturë, e më pas vazhdon në drejtim të bjeshkëve të Strellcit dhe kur arrin tek “Kroni i Lajthisë” fillimisht e privon me armë duke shtënë dy herë në kokë, e më pas për të humbur gjurmë të njëjtën e mbulon me disa drunjë dhe largohet nga vendi i ngjarjes, kurse viktima më 27.12.2015 është gjetë pa shenja jete në vendin e ngjarjes nga disa kalimtarë të rastit.
Sipas aktakuzës, më parë e gjerë më 09.11.2015, në fshatin Strellc Komuna e Deçanit, pa autorizim ka poseduar armën dhe atë një revole të tipit të panjohur dhe një pushkë gjuetie me numër serik 0193117 si dhe 12 fishekë të kësaj pushke , në atë mënyrë që me revole ditën kritike ka kryer veprën penale të cekur si më lartë.
Gjithashtu, sipas aktakuzës më parë dhe gjerë më 23.05.2017, në fshatin Strellc i ulët Komuna e Decanit, pa autorizim ka poseduar armën dhe atë një armë AK-47 me numër serik 120331141 dhe 2 karikator të zbrazet, në atë që policia gjatë bastisjes dhe kontrollit në shtëpinë e të pandehurit në dhomën e fjetjes gjejnë dhe sekuestrojnë armën e cekur si më lartë.
Me këto veprime, prokuroria e ngarkon të akuzuarin me veprën penale të “vrasjes së rëndë” nga neni 179 i KPRK–së dhe për “mbajtja në pronësi, kontroll ose posedim të paautorizuar të armëve” nga neni 374 i KPRK–së. /BetimipërDrejtësi