Ditë më parë, kryetarja e Kuvendit të Kosovës, Vjosa Osmani, edhe zyrtarisht e konfirmoi largimin nga Lidhja Demokratike e Kosovës, pas vendimit që ka marrë Këshilli i Përgjithshëm i kësaj partie që ta largojë kryeparlamentaren nga të gjitha funksionet e partisë, raporton Front Online.

I pyetur se sa do ta dëmton LDK-në largimi i Vjosa Osmanit, deputeti Ardian Shala për FrontOnline tha se largimi i Vjosës dhe disa figurave të tjera të kësaj partie që kanë qenë më të votuari do të jetë hendikep për të ardhëm e LDK-së.

“Nëse pyetem unë, unë s’kam qenë asnjëherë për asnjë largim. Në traditën e LDK-së nuk ka qenë largimi i njerëzve, por prap se prap secili i ka vendimet e veta. Ne e dimë se Këshilli i Përgjithshëm e ka marrë një vendim të tillë, nuk është e mirë për LDK-në d.m.th. e ka lënduar ky largim. Normalisht që pasoja ka me pasë, jo me këtë, por me çdo ndarje me çdo largim sidomos të disa njerëzve që kanë qenë figura më të votuara ka me qenë hendikep për të ardhmen, nuk do t’ia dëshiroja Vjosa Osmanit një gjë të tillë mua më mbetët t’i dëshiroj suksese dhe dua ta falënderoj për bashkëpunimin që kemi pasur deri tani”, u shpreh deputeti Shala për Front Online.