Gjykata Themelore në Gjakovë, të mërkurën, e ka shpallur fajtor asamblistin nga radhët e Lidhjes Demokratike të Kosovës (LDK), në Kuvendin Komunal në Gjakovë, Sadik Hoti, i cili po akuzohet për deklarim të rrejshëm të pasurisë.
Sipas aktgjykimit të shpallur nga gjykatësi Drilon Haraçia, i akuzuari Hoti është dënuar me gjashtë muaj burgim me kusht dhe 300 euro gjobë, raporton “Betimi për Drejtësi”.
Dënimi me burgim ndaj të akuzuarit nuk do të ekzekutohet nëse i njëjti nuk kryen vepër tjetër penale brenda periudhës verifikuese prej një viti.
Ndërsa, gjobën i njëjti është i obliguar që ta paguaj në afat prej 15 ditësh nga dita e plotfuqishmërisë së këtij aktgjykimi.
Paraprakisht në seancën e shqyrtimit gjyqësor të mbajtur në paraditen e së mërkurës, i akuzuari Hoti e ka pranuar fajësinë për veprën penale me të cilën ngarkohet.
Pranimin e fajësisë nga ana e të akuzuarit nuk e ka kundërshtuar prokurorja Deshirë Jusaj, e cila tha se ky pranim ka mbështetje në prova dhe shkresa të lëndës.
Ndërsa, mbrojtësi i të akuzuarit, avokati Nexhmendin Gashi kërkojë nga gjykata që t’i ketë parasysh rrethanat lehtësuese me rastin e shqiptimit të llojit dhe lartësisë së dënimit.
Ndryshe, Sadik Hoti po akuzohet nga Prokuroria në Gjakovë se ka kryer veprën penale “mos raportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare”, nga neni 430, paragrafi 2 të KPRK-së.
Sipas aktakuzës, Sadik Hoti po akuzohet se nga 1 deri më 31 mars te vitit 2019 në Gjakovë, në rrugën “Nënë Tereza” në Kuvendin Komunal në Gjakovë, në cilësinë e zyrtarit të lartë publik, ka qenë i detyruar të bëjë deklarimin e pasurisë, të të ardhurave, të dhuratave, të dobisë tjetër pasurore ose të detyrimeve finaciare, i akuzuari Hoti nuk ka paraqitur saktë të dhënat e kërkuara, duke mos shënuar në formularin e deklarimit të pasurisë veturën e cila është në pronësi të djalit të tij “Volkswagen VW- Golf 1K”, vit i prodhimit 2011.
