Gjykata Themelore në Pejë, dega në Istog, në seancën fillestare të së mërkurës e ka dënuar me 200 euro gjobë, të akuzuarin për asgjësim apo dëmtim të pasurisë, Selajdin Osmanaj.

I akuzuari, gjithashtu është obliguar edhe në shpenzimet procedurale në shumën prej 50 euro, ndërsa e dëmtuara është udhëzuar në kontest të rregullt juridiko-civil, raporton “Betimi për Drejtësi”.

Para se të shpallej aktgjykimi, nga gjykatësi Arben Mustafaj, i akuzuari Osmanaj e ka pranuar fajësinë për veprën penale e cila i vihej në barrë, duke shprehur keqardhje për rastin e ndodhur.

Edhe prokurori Arben Hoti, është pajtuar me pranimin e fajësisë nga ana e të akuzuarit, duke shtuar se një pranim i tillë është i vullnetshëm dhe se ka mbështetje në shkresat e lëndës.

Ndryshe, Prokuroria Themelore në Pejë, më 3 korrik 2020, ka ngritur aktakuzë ndaj Selajdin Osmanaj, me pretendimin se ka kryer veprën penale “asgjësimi apo dëmtimi i pasurisë”, nga neni 321 i Kodit Penal të Republikës së Kosovës.

Sipas aktakuzës, më 17 prill 2020, rreth orës 11:30, në fshatin Studenicë të Komunës së Istogut, rruga “Qazim Hakaj, i pandehuri Osmanaj ka dëmtuar pasurinë e Policisë së Kosovës.

Në aktakuzë thuhet se, përderisa i pandehuri ka qenë duke ecur në rrugën Vrellë-Kaliqan, dhe posa ka arritur në vendin e lartcekur ka vërejtur veturën e policisë të ndaluar, dhe i njëjti nga një largësi prej 10-15 metra fillimisht ka gjuajtur me gur në drejtim të veturës së policisë por pa arritur të qëlloj. Pas kësaj kanë dalur nga vetura zyrtarët policor Zemir Sabotiq dhe Agim Qorraj, e ku i pandehuri ka gjuajtur përsëri gur në drejtim të veturës së policisë, të cilën e ka goditur në kapakun e motorit, e pastaj siç thuhet aty guri është bartur edhe në parafango, me ç’rast janë dëmtuar që të dyja pjesët e veturës.

Tutje në aktakuzë thuhet, se pas kësaj i pandehuri është arrestuar nga zyrtarët policor.