Të martën, komunës së Vitisë iu shtuan edhe tre raste me të infektuar me Covid-19, duke çuar në 52 numrin e të prekurve me këtë virus, raporton Front Online.

Rreth gjendjes së pacientëve të infektuar me këtë virus, për portalin “Front Online”, foli zëdhënësi i Shtabit Emergjent për Covid-19 në Viti, Tefik Salihu.

Ai tha se deri tani janë shëruar shtatë persona.

“Mbrëmë në IKSHPK janë diagnostikuar edhe tre persona me virusin Korona nga Komuna e Vitisë, duke ngritur në 52 numrin e të infektuarve në komunën tonë. Deri tani shtatë persona janë shëruar. Pesë të infektuar po trajtohen në Klinikën Infektive në Prishtinë, kurse të tjerët në shtëpi. Gjendja shëndetësore e të gjithëve është stabile, pa shenja të përkeqësimit. Mosha e të infektuarve është e ndryshme nga 2 deri ne 77 vjet”, u shpreh ai.

Tutje, Salihu tregoi se janë në pritje për rezultatet e ri-restimeve për disa pacientë.

“Aktualisht nuk ka persona të dyshimtë, por po gjurmohen kontaktet e tre vetave të cilën mbrëmë dolën pozitiv. Ndërkohë sonte priten rezultatet e ri-testimit të 14 personave të infektuar më herët, ndërsa një tjetër do të testohet për herë të parë”, deklaroi Salihu për Front Online.

Vitia ishte komuna e parë e prekur me Covid-19 në Kosovë./Front Online/