Kandidati për president i Shteteve të Bashkuara, Donald Trump, pritet të bëjë fushatë në shtetin e Miçiganit përgjatë kësaj jave.

Siç njofton korrespodenti i Zërit të Amerikës, Scott Stearns, Miçigani është një nga pak shtetet që mund të ketë rol vendimtar në rezultatin e zgjedhjeve presidenciale të muajit nëntor.

Votuesit në Miçigan zgjodhën Donald Trump-in në 2016, por Joe Bidenin në 2020. Është një shtet ku ekipet elektorale të të dy kandidatëve besojnë se mund të sigurojnë fitore në nëntor.

Pjesë e synimeve të Trump-it në Miçigan është të sigurojë votat e punëtorëve të industrisë së automobilave, të cilëve sipas tij, po u rrezikohen vendet e punës për shkak të politikave të administratës Biden për energjinë e rinovueshme, përfshirë subvencionimet për blerjen e makinave elektrike.

Ky është mesazhi që ai pritet të përcjellë në tubimin e së mërkurës në qendër të Miçiganit.

“Do të qëndrojmë në Miçigan, një shtet që është shkatërruar për shkak të industrisë së automjeteve. Nuk do ketë më vende punë në Miçigan. Nuk do ketë më asnjë vend pune në industrinë e automjeteve. Sepse po përfitojnë vende të tjera, këto vende pune po hapen në Kinë dhe në shtete të tjera, për shkak të politikave qesharake për prodhimin e makinave elektrike”, u shpreh Donald Trumpi, kandidati republikan për President.

Sindikata kryesore që përfaqëson punonjësit e industrisë së automobilave në Miçigan ka mbështetur Biden-in përballë Trump-it.

Paul Torrente është një nga përfaqësuesit e sindikatës.

“Donald Trumpi ka mbështetjen e korporatave në Miçigan, pikërisht të atyre që kufizojnë të drejtat e punëtorëve. Pra, kur ai thotë se ka mbështetjen e Miçiganit, në fakt ai nuk ka përkrahjen e punëtorëve në Miçigan, vetëm 1 për qind e mbështet atë”, tha ai.

Këtë mesazh po përdor presidenti Biden për të ruajtur votat e familjeve të punonjësve të sindikatave, që sipas një ankete të rrjetit NBC News, vazhdojnë ta preferojnë atë përballë kundërkandidatit Trump, por me një diferencë më të ngushtë se 4 vjet më parë.

“Vizioni i Donald Trump-it për Amerikën është hakmarrja dhe ndëshkimi. Një ish-president që u mund në zgjedhje dhe e shikon botën nga Mar-a-Lago, që i përulet miliarderëve dhe përçmon punonjësit e sindikatave. Jo vetëm nuk na mbështet, por ai na përbuz”, tha presidenti Biden.

Një disavantazh për presidentin Biden në Miçigan, mund të jenë votuesit tradicionalisht demokratë që kundërshtojnë mbështetjen që Presidenti i ka dhënë ndaj Izraelit për luftën në Gazë.

“Mendoj se ai po e bën qëllimisht, po ndjek një politikë që është jo vetëm çnjerëzore dhe e neveritshme për të gjithë ata që shpresonin për diçka ndryshe, por që do ketë pasoja në nëntor 2024”, thotë Omar Suleiman, imam në Qendrën Islamike në Detroit.

Në qytetin Adams, në Miçigan, votuesit besojnë se presidenti Biden nuk e ka trajtuar siç duhet çështjen e emigracionit të paligjshëm dhe e ka humbur kontrollin mbi kufijtë, thotë zyrtari i bashkisë së qytetit, Randy Johnson.

“Shikoni se sa njerëz dhe nuk e po e them me të keq, por shikoni sa njerëz kanë ardhur. Shikoni se sa njerëz kanë ardhur, që nuk e dinim. Shihni se njerëz të këqij kanë hyrë. Muri i Trump-it në kufi do të kishte penguar që kjo të ndodhte”, thotë ai.

Trump thotë se votuesit në Miçigan janë lodhur nga Biden-i.

“Këtë nëntor, shteti i madh i Miçiganit do t’i thotë Joe Biden-it se është i pushuar nga puna dhe duhet të largohet”, tha Trump.

Presidenti Biden beson se mbështetja e tij e fortë që gëzon tek puonjësit e sindikatave do ta ndihmojë atë të rizgjidhet.

“Jeni më të mirët në botë. Më mbështetët në 2020. Falë jush, jam sot President i Shteteve të Bashkuara. Falë jush. Ky është fakt. Dhe falë jush, do e bëjmë përsëri humbës Donald Trumpin në 2024”, tha Biden.