Pas nënshkrimit të marrëveshjes për normalizim ekonomik mes Kosovës dhe Serbisë në Shtëpinë e Bardhë ka reaguar kreu i Partisë Demokratike, Lulzim Basha.
Basha ka falënderuar presidentin Trump dhe Shtetet e Bashkuara të Amerikës, për siç thotë ai vëmendjen dhe përkushtimin ndaj Kosovës dhe Ballkanit.
Lideri i opozitës në Shqipëri në dy shkrimet e tij në Twitter shkruan:
“Personalisht dhe në emër të Partisë Demokratike përshëndes marrëveshjen e arritur mes delegacioneve të Kosovës dhe Serbisë në Shtëpinë e Bardhë. Një falenderim të veçantë për Presidentin Trump dhe SHBA, për vëmendjen dhe përkushtimin ndaj Kosovës dhe Ballkanit. Shpreh shpresën dhe besimin se kjo marrëveshje do të përbëjë një hap të rëndësishëm drejt normalizimit të marrëdhënieve dhe njohjes reciproke mes Republikës së Kosovës dhe Republikës së Serbisë, duke i kontribuar kështu paqes, stabilitetit dhe integrimit Euro-Atlantik të rajonit”.
