Ka një muaj që kur banorët e fshatit Shashkoc të Prishtinës përballen me mungesë të ujit të pijshëm, ndonëse temperaturat janë ngritur dukshëm, raporton portali “Front Online”.

Banorët fajësojnë zyrtarët e Ujësjellësit Rajonal “Prishtina” se nuk po ua zgjidhë problemin, prandaj po detyrohen të mbushin ujë me bidonë te një krua i fshatit.

“Katastrofë, hajni e madhe, nuk na furnizojnë me ujë ndonëse faturat na sjellin vazhdimisht”, ankohet një banor i Fshatit derisa bashkë me fëmijët e tij ka dalë për të mbushur ujë te një krua i fshatit.

Në anën tjetër, zëdhënësja e kësaj kompanie, Arjeta Mjeku tha për “Front Online” se ka reduktime të ujit për shkak të dëmtimit të rezervuarit.

Mjeku thotë se janë duke punuar që sa më shpejt të rregullohet kjo çështje.

“Kemi telashe me dëmtimin e rezervuarit si dhe të pompave që gjenden në atë fshat. Janë duke u marrë shërbimi i elektros dhe makinerisë që t’i rregullojmë pompat sa më shpejt”.

Mjeku bëri të ditur se në këtë zonë të Prishtinës po planifikohet të ndërtohet një rezervuar i ri.

“Aty pas analizave të inxhinierëve tanë planifikohet që të ndërtohet një rezervuar i ri”./Front Online/