1617 persona në Kosovë ende figurojnë të zhdukur nga lufta e fundit.

E, familjarët e tyre ende janë në ankth tash e më shumë se dy dekada, duke mos pasur informacione për më të dashurit e tyre.

Ata në vazhdimësi po kërkojnë që kjo çështje të marr epilog dhe presioni ndaj Serbisë të shtohet.

Kërkesë të ngjashme ka edhe kryetari i delegacionit të Kosovës për personat e pagjetur në bisedime me Serbinë, Andin Hoti.

Ai në një intervistë për FrontOnline deklaron se nëse Bashkimi Evropian me të vërtetë dëshiron që Kosova dhe Serbia të normalizojnë marrëdhëniet mes vete duhet ta zgjidhin këtë çështje.

Ndryshe, sipas tij, nuk do të ketë fare normalizim.

“Nëse Bashkimi Evropian është i interesuar që Kosova dhe Serbia të shkojë drejt drejtimit të normalizimit të marrëdhënieve. Serbia duhet të jetë e gatshme të pranoj krimet e saj që i ka bë, Serbia duhet të jetë e gatshme që së paku pas 22 viteve ta lë politikën anash në fatin e personave të zhdukur dhe të tregojë dhe të ndalë krimet e shumëfishta që po i bën sepse fatkeqësisht Serbia po vazhdon të bëj krime ndaj fatit të personave të zhdukur duke mos treguar informacione se ku janë, dhe Serbia duhet t’i ndalë këto, përndryshe as Kosova dhe as Serbia nuk mund të kenë normalizim të marrëdhënieve”, ka thënë ai, për FrontOnline.

Marrëveshja finale me Serbinë nuk mund të arrihet pa u zgjidhur çështja e personave të zhdukur.

Dhe, këtë e ka thënë edhe kryeministri i Kosovës, Albin Kurti.

Kështu ka deklaruar për FrontOnline, kryetari i Komisionit Qeveritar për personat e pagjetur, Andin Hoti.

“Pikërisht është kushtëzuar pala serbe dhe kjo ka qenë edhe publike që marrëveshja finale nuk mund të arrihet, nuk mund as të flitet, pa arritjen e një marrëveshjeje për fatin e personave të zhdukur, prandaj është çështje e kryeministrit Kurti, mirëpo besoj se edhe ai e ka thënë edhe besoj se kjo do të jetë qëllimi ynë se nuk do të ketë asnjë marrëveshje të përgjithshme pa zgjidhjen e fatit të personave të zhdukur, pa zgjidhjen e kësaj fushe dhe besoj se i qëndrojmë kësaj prapa, i qëndron kryeministri Kurti sepse unë natyrisht që i qëndroj edhe në takimet në Bruksel që i kemi pas”, është shprehur Hoti, për FrontOnline.

Hoti tregon se cila është sfida kryesore tek çështja e personave të zhdukur

Kryetari i delegacionit të Kosovës për personat e pagjetur në bisedime me Serbinë, Andin Hoti, deklaron se 22 vite që nga paslufta nuk është bërë aq sa duhet për këtë çështje.

Mirëpo, kur dihet fakti se kush është përballë dhe me kënd po ballafaqohet Kosova, atëherë kjo është sfidë.

Kurse, përmend se cilat janë dy sfidat kryesore me të cilat po përballet Kosova.

“Sfida kryesore është mungesa e informacionit të besueshëm dhe politizimi i çështjes së personave të zhdukur nga ana e Serbisë”, ka thënë ai, për FrontOnline.

Presioni i vazhdueshme nuk ka kryer punë.

Serbia duhet të kushtëzohet në forma nga më të ndryshmet në mënyrë që të identifikohen personat e zhdukur.

Kështu, thotë Andin Hoti, kryetari i Komisionit Qeveritar për personat e pagjetur.

“Presioni në vazhdimësi ka qenë jo vetëm sot, por nuk ka mjaftu që ne me i identifiku personat e zhdukur, nuk ka mjaftu që me bind Serbinë me trajtua këtë çështje si çështje humane prandaj ne po kërkojmë që të kushtëzohet Serbia në forma të ndryshme që ajo të lejojë hapjen e arkivave kryesisht ato konfidenciale që janë të ushtrisë dhe të policisë serbe të luftës së fundit të Kosovë”, ka thënë ai.

Sipas tij, pa pasur epilog çështja e personave të pagjetur s’ka normalizim të marrëdhënieve Kosovë-Serbi

“Jo vetëm që duhet rritur, Bashkimi Evropian në këtë rast ndërmjetëson dialogun Kosovë-Serbi por jo vetëm që duhet të rritet presioni por e thash që duhet të kushtëzohet Serbia sepse nuk mund as të imagjinohet e ka thënë këtë edhe z.Kurti në deklaratën e tij, nuk mund as të imagjinohet normalizimi i marrëdhënieve Kosovë-Serbi pa pas një epilog fati i personave të zhdukur, pa u zgjidh çështja e personave të zhdukur”, është shprehur Hoti, për FrontOnline.

Hoti: Besoj se çështja e personave të zhdukur shpejtë do të marrë epilog

Kryetari i delegacionit të Kosovës për personat e pagjetur, në bisedime me Serbinë, Andin Hoti, ka thënë se jo vetëm Qeveria e Kosovës por edhe ndërkombëtarë të involvuar në procesin e dialogut po e prioritizojnë çështjen e personave të zhdukur.

E, për këtë Hoti beson se fati i personave të zhdukur shpejtë do të marrë një epilog.

“Prandaj, po e shoh dhe po më jep një shpresë të them të drejtën, kohët e fundit prioritizimi i çështjes së personave të zhdukur e keni parë edhe në media edhe në diskutime qoftë në kryeministrit qoftë të zv. kryeministrit, qoftë presidentes qoftë tash që ishin edhe përfaqësuesit e Shteteve të Bashkuara të Amerikës dhe BE-së, Lajçak dhe Escobar e keni vërejt një frymë të asaj që secili prej tyre është i fokusuar në zgjidhjen e fatit të personave të zhdukur, është i fokusuar në trajtimin e kësaj çështje dhe po besoj që kjo po ma jep një shpresë që kjo çështje shpejtë do ta merr një epilog”, ka thënë ai.

Pas përfundimit të luftës në Kosovë në vitin 1999 rezultuan 6 mijë e 500 persona të zhdukur.

Shumica prej tyre u gjetën, si rezultat i zhvarrimeve në varreza masive në Kosovë dhe Serbi./FrontOnline