Marrëveshja e arritur në Uashington ditë më parë ndërmjet kryeministrit të Kosovës, Avdullah Hoti dhe Presidentit të Serbisë, Aleksandër Vuçiq me ndërmjetësimin e presidentit amerikan Donald Trump, solli edhe Mini-Shengenin ballkanik i cili është kritikuar vazhdimisht nga kryeministri Hoti dhe lideri i LDK-së, Isa Mustafa, të cilën ky i fundit e pati quajtur edhe si Mini-Shengeni i Mini-Jugosllavëve.
Por, ishte pikërisht kryeministri Hoti ai i cili e nënshkroi këtë marrëveshje për të cilën kohë më parë bëri shumë “zhurmë”.
Për këtë veprim të tij, Hoti u kritikua mjaftë shumë. Kritika mori nga të gjithë oponentët.
Njohësja e çështjeve politike, Donika Emini, në një prononcim për Front Online, tha se ndryshimi i qëndrimit për Mini-Shengenin ballkanik nga kryeministrit Hoti dhe lideri i LDK-së, Isa Mustafa, nuk është për tu çuditur, pasi që siç tha ajo politika po funksionon pa parime dhe kjo ka reflektuar edhe në arritjen e marrëveshjes së fundit.
“Qysh dje vet zëvendëskryeministri Driton Selmanaj tha se kjo pikë është negociuar dhe është shtyrë shumë nga vetë presidentit Trump kjo për ta lehtësuar opinionin publik e sidomos votuesin e LDK-së për këtë ndryshim drastik në qasjen e LDK-së dhe vet z.Mustafa i cili e ka quajtur idenë e Mini-Shengenit- Mini-jugosllave që megjithatë i shërben Vuçiqit dhe Serbisë. Ky ndryshim drastik nuk është për tu çuditur duke e marrë parasysh se e kemi një politikë ku funksionon pa parime dhe kjo reflektohet normalisht edhe në marrëveshjen e fundit”, ka deklaruar ajo për Front Online.
E njohësi tjetër i këtyre çështjeve, Arton Demhasaj, thotë së nënshkrimi i marrëveshjes me Mini-Shengenin ballkanik nga liderët e partive politike të cilët janë pjesë e Qeverisë tregon se nuk kanë pasur konsistencë pasi që ata e kanë quajtur këtë ide si një Jugosllavi të re.
“Kjo tregon se nuk ka pasur konsistencë nga vetë kundërshtuesit e kësaj ideje sepse e dimë se shumica e liderëve që janë pjesë e kësaj qeverisje e kanë kundërshtuar këtë ide madje kanë shkuar aq larg sa e kanë quajtur edhe një lloj të një Jugosllavie të re edhe tash e kanë pranuar pikërisht atë”, tha Demhasaj pwr Front Online.
Ideja për Mini-Shengenin Ballkanik doli nga takimi i Ohrit ku Edi Rama, Zoran Zaev dhe Aleksandar Vuçiq, u dakorduan që ta shtyjnë përpara këtë projekt i cili ngërthen katër liritë e Bashkimit Evropian: lirinë e lëvizjes së njerëzve, të mallrave, shërbimeve dhe kapitaleve.
