Ministria e Integrimeve Europiane u shua me zyrtarizimin e koalicionit qeverisës, LDK-AAK-Nisma.

E kompetencat e saj tash e tutje do t`i kalojnë zyrës së kryeministrit, në krye të së cilës tash është pikërisht kryeministri i dalë nga ky koalicion, Avdullah Hoti.

Vendimin për diçka të këtillë e mori sot kabineti qeveritar. E atë po e mirëpret njohësi i çështjeve të integrimeve europiane, Demush Shasha.

Kjo për faktin se kryeministri, sipas tij, është i vetmi që mund të bartë peshën shtetërore të procesit integrues dhe i vetmi që ka fuqinë e duhur vendimarrëse.

“Ne e kemi mirëpritur vendimin e Qeverisë Hoti për ri-organizimin e strukturës institucionale përgjegjëse për procesin integrues dhe vendosjen e saj nën përgjegjësinë e Zyrës së Kryeministrit”, theksoi Shasha për FrontOnline.

Hyrja në fuqi e vendimit e obligon Zyrën e Kryeministrit të fillojë procedurat për krijimin e një agjencia për integrim evropian.

E sapo të ndodhë krijimi i saj, Shasha tregon për Front Online, se Qeverinë e presin katër hapa.

“Emërimin e njërit nga Zëvendës Kryeministrat përgjegjës për Integrim Evropian, Themelimi i Agjencisë për Integrim Evropian: Përgjegjësitë e MIE-së tani do të kalojnë në Agjencinë për Integrim Evropian brenda Zyrës së Kryeministrit. Miratimi i Rregullores për AIE: Plotësim ndryshimi i akteve të ndërlidhura normative qeveritare në fushën e integrimit Evropian”, u shpreh Shasha për Front Online.

Ndryshe, Ministria e Integrimeve për aq kohë sa ekzistoi u morë me çështjet që lidheshin si: Liberalizimi i vizave, Marrëveshja Stabilizim Asocimi, Përputhshmëria e legjislacionit kombëtar me legjislacionin e BE-së, zbatimin e Bursës “YoungCellScheme” të BE-së për studimet MASTER.