Në përvjetorin e katërt të vdekjes së legjendës shqiptare të futbollit, Fadil Vokrri, Përfaqësuesja e Kosovës e ka shënuar një fitore dramatike sonte.
Në stadiumin “Fadil Vokrri”, Kosova ishte sonte nikoqire e Irlandës së Veriut, raporton FrontOnline.
Ndeshja e vlefshme për grupin të Ligës C, i takoi Kosovës 3:2.
Trajneri i Kosovës, Alain Giresse e cilësoi tepër të rëndësishme këtë fitore, teksa foli edhe për “finalen” e 12 qershorit ndaj Greqisë në Volos.
“Rëndësi ka që fituam ndeshjen, ishte një fitore e merituar. Sa i përket asaj çfarë ndodhi në fushë mund të diskutojmë pafund, rëndësi kishte fitorja”, ka thënë fillimisht trajneri francez në “SSK”, përcjell FrontOnline.
Mesfusha? “Reagimi i treshes së mesfushës ishte i duhur, ai që prisnim. Dreseviq dhe Muslija sollën freksi në mesfushën tonë, jemi të kënaqur”.
Kërkesa ime që lojtarët e krahut të ndihmonin edhe në mbrojtje? “Po, sepse nuk mund të parashikojmë rrethanat e një ndeshjeje. Është situata e lojës që na detyron ndonjëherë të rikthehemi për të ndihmuar mbrojtjen, por nuk ndodhi sepse unë u kërkova të riktheheshin”.
“Rrudhani ia doli, ishte ndeshja e parë, ai bëri një ndeshje shumë të mirë. Ujkanin e njohim, ai është gati sa herë kemi nevojë për të”.
Ndëshkimet me kartonë të verdhë? “Nuk ka nevojë për përgjigje. Nuk jam i kënaqur që do na mungojnë tre lojtarë, padyshim që nuk jam i kënaqur, shtohen problemet. Greqia? Do luajmë me 11 lojtarë”, deklaroi trajneri francez./FrontOnline/