Komisioni hetimor parlamentar lidhur me procesin e privatizimit në Kosovë ka intervistuat sot Ahmet Shalën, ish-zëvendësdrejtor menaxhues në AKM, raporton Front Online.
Shala është pyetur për çmimin e shitjes së pronave nga AKM-ja dhe diskutimi që është bërë rreth tyre.
“Ne nuk kemi pasur përvojë në modele të privatizimit por kemi pasur fatin që i kemi pasur ekspertët më të mirë amerikan dhe evropian. Kjo është diskutuar edhe në atë kohë. Ata nuk kanë vendosur çmim. Është debatuar me të drejtë çmimi aq i ulët i pronave e sidomos ai i tokave bujqësore. Bordi i AKM-së ka pasur të drejtë që të angazhojë një hulumtues se a është i njëjti çmim edhe në treg apo jo. Kjo ka ndodhur para nënshkrimit të kontratave”, ka thënë ai.
Anëtarët e Komisionit e kanë pyetur Shalën nëse politika ka pasur gisht ose ndërhyrje në shitjen e pronave.
Ai tha se ka qenë e pamundur.
“Në proces për shpalljen e fituesit ka qenë e pamundur për të ndikuar. Nuk ka pasur mundësi sepse kanë qenë totalisht anonim. Nuk ka pasur mundësi që të shitet një pronë duke e ditur se kush është. Ata që janë përpjekur dhe është ngritur propaganda për korrupsion dhe në procesin si proces ka pasur dëshirë për të ndërhyrë por ka qenë e pamundur”, ka thënë ai.
Para anëtarëve të Komisionit ai deklaroi se për këto çështje po flet vetëm për sa i përket viteve sa edhe ai ishte pjesë e AKM-së./Front Online/
