Me kundërshtime të ashpra, protesta, e hedhje gazi lotsjellës nga opozita, Kuvendi i Kosovës vite më parë kishte miratuar Demarkacionin me Malin e Zi.
Njëri nga kundërshtuesit e kësaj marrëveshjeje ka qenë edhe ish-deputeti i LDK-së Shpejtim Bulliqi, asokohe kryetari i Komisionit Shtetëror për Shënjimin dhe Mirëmbajtjen e Kufirit Shtetëror Kosovë – Mali i Zi.
Ish- deputet i LDK-së, e që më pas aderoi në Lëvizjen Vetëvendosje, Bulliqi ishte bërë pengesë për moskalimin e demarkacionit në Kuvendin e Kosovës, pasi sipas tij, Kosova po humbte territor.
E kur kanë kaluar tashmë katër vite që kur kjo marrëveshje është ratifikuar nga Kuvendi i Kosovës, kryeministri i Republikës së Kosovës, Albin Kurti e ka rikthyer edhe njëherë këtë temë.
Kurti ka thënë se po e pret ardhjen e qeverisë së re në Mal të Zi, me shpresën që do të lëvizë diçka për korrigjimin e demarkimit të kufirit.
Prej dje në krye të Qeverisë malazeze është Dritan Abazoviq.
Mirëpo se sa mund të rikthehet në tavolinë një temë e tillë me kryeministër të Malit të Zi, Dritan Abazoviq, ka folur shkurtimisht për Front Online, ish kryesuesi i Komisionit Shtetërorë dhe Mirëmbajtjes së Kufirit Shtetërorë Kosovë-Mali i Zi, Shpejtim Bulliqi.
Ai thotë për Front Online se vendimet e institucioneve duhet shtyer përpara.
“Sipas meje duhet vendimet e institucioneve me i shtyer përpara”, deklaroi shkurtimisht ai.
Kuvendi i Kosovës e kishte miratuar Demarkacionin me Malin e Zi në vitin 2018 me 80 vota pro e 11 kundër.
Ratifikimi i Marrëveshjes për Demarkacionin e kufirit me Malin e Zi, besohej se po e mbante peng procesin e liberalizimit të vizave për qytetarët e Kosovës, ngase Komisioni Evropian e kishte vënë atë si kusht që Kosova duhet ta përmbushë për heqjen e vizave, por një gjë e tillë nuk ndodhi edhe pas disa vjetësh.
