Rreziku i përdorimit të armëve bërthamore nga presidenti rus Vladimir Putin si pjesë e luftës së tij në Ukrainë është ulur në përgjigje të presionit ndërkombëtar, tha kancelari gjerman, Olaf Scholz.

“Lufta po vazhdon me “brutalitet të pazbutur” edhe pse, tani për tani, një gjë kishte ndryshuar”, tha Scholz, shkruan Reuters.

“Rusia ka pushuar së kërcënuari se do të përdorë armë bërthamore. Si reagim ndaj komunitetit ndërkombëtar duke shënuar një vijë të kuqe. Pavarësisht ndarjeve të thella, ishte e rëndësishme që dialogu me Kremlinin të vazhdonte”, shtoi lideri gjerman.

Putin tha të mërkurën se rreziku i një lufte bërthamore po rritej, por këmbënguli se Rusia nuk ishte “çmendur” dhe se e sheh arsenalin e saj bërthamor si një parandalues thjesht mbrojtës.

Gazeta gjermane Funke tha se intervista me Scholz u krye të hënën dhe citimet u autorizuan të mërkurën pasdite.

Scholz tha se Putini duhej të ndalonte luftën, por më pas, ai do të ishte i përgatitur të fliste me Rusinë për kontrollin e armëve në Evropë, duke shtuar se kjo ishte ofruar edhe para luftës.

Duke mbrojtur mbështetjen e Gjermanisë për Ukrainën, për të cilën kritikët në Kiev dhe në Evropë thonë se ka qenë shumë e rezervuar, Scholz tha pas Shteteve të Bashkuara, Gjermania ishte një nga mbështetësit më të mëdhenj të Ukrainës, duke përfshirë furnizimet me armë.

“Ne po bëjmë gjithçka që mundemi për të parandaluar një luftë të drejtpërdrejtë midis Rusisë dhe NATO-s. Një konflikt i tillë do të kishte vetëm humbës – në të gjithë botën,” tha ai.