Transmetuesit publikë të Malit të Zi dhe Maqedonisë së Veriut kanë vendosur që këto vende të mos marrin pjesë në festivalin “Eurovision Song Contest 2023”, i cili do të mbahet në qytetin anglez të Liverpoolit.

“Pas shqyrtimit të resurseve në dispozicion, kostove të të gjithë projektit dhe detyrimeve që Shërbimi Publik pret në periudhën e ardhshme, është marrë vendimi që Mali i Zi të mos marrë pjesë në Eurovizion vitin e ardhshëm”, raporton RTCG, transmeton Klankosova.tv.

“Vendimi është marrë sepse ka qenë vlerësoi se burimet ekzistuese duhet të drejtohen drejt financimit të projekteve kombëtare aktuale dhe të planifikuara dhe reformave organizative e programore. Përveç kostove të konsiderueshme të tarifës së regjistrimit, si dhe kostos së qëndrimit në Britaninë e Madhe, u përballëm edhe me mungesë interesi nga sponsorët”, thuhet tutje mes tjerash.

Një shpjegim të ngjashëm e dha edhe transmetuesi shtetëror i Maqedonisë së Veriut, MRT, i cili njoftoi se vendi nuk do të marrë pjesë në Evrovizion vitin e ardhshëm për të kursyer në faturat e energjisë elektrike.

“Vendimi është në interesin më të mirë të publikut, duke pasur parasysh kostot e shtuara për shkak të krizës energjetike, të cilat zënë një pjesë të madhe të buxhetit për shërbimet publike”, thuhet në mesazhin e transmetuesit të publikuar në faqen e tij.

Thuhet se kursimet do të vijnë pasi nuk do të paguhet asnjë tarifë regjistrimi, e cila pritet të jetë më e lartë se 39 mijë e 143 euro e ngarkuar vitin e kaluar.

Është hera e parë që Maqedonia e Veriut nuk do të marrë pjesë në garën e Eurovizionit që nga pavarësia e saj nga ish-Jugosllavia në vitin 1991.