Dhuna në familje është rritur dukshëm sidomos gjatë dy vjetëve të fundit.

Siç duket mbyllja si shkak i pandemisë me Covid-19, ndikoi edhe më tepër në ngritjen e rasteve të dhunës në familje, ku në disa raste burri rrahu gruan apo anasjelltas.

Raste të ngjashme ndodhën në tërë Kosovën, e shumë prej tyre përfunduan me trajtim mjekësor.

Nga Policia e Kosovës, për FrontOnline kanë bërë të ditur se në vitin 2021 janë raportuar gjithsej 2486 raste të dhunës në familje.

E, nga to si pasojë e dhunës janë shtatë raste të vrasjeve kur prej tyre tri janë femra.

“Gjatë vitit 2021 në kuadër të rasteve të dhunës në familje janë 7 raste vrasje, prej tyre 3 janë femra”, thuhet në përgjigjen e Policisë, për FrontOnline.

Sipas statistikave të Policisë, të dërguara për FrontOnline nga 2486 raste, numër më i madh është ai i femrave.

“Janë gjithsej 1986 femra dhe 500 meshkuj”, bën të ditur Policia.

Shifra të larta të dhunës në familje pati edhe në vitet e kaluara.

Në vitin 2020 ishin raportuar 2 mijë e 69 raste të dhunës në familje, ku 1 mijë e 636 prej viktimave ishin femra, ndërsa 465 të tjerë ishin meshkuj.

Gjithsej viktima përgjatë kësaj kohe në kuadër të dhunës në familje ishin 2 mijë e 101.

Nga Policia e Kosovës kanë bërë të ditur gjithashtu se në vitin 2019 u raportuan 1 mijë e 915 raste të dhunës në familje, ndërsa në vitin 2018 ishin gjithsej 1534 raste.

Po ashtu është thënë se Policia e Kosovës që nga themelimi i ka trajtuar me seriozitetin e duhur rastet e dhunës në familje.

“Ndër vite policia ka realizuar edhe fushata vetëdijësuese për pasojat e dhunës në familje duke e potencuar në vazhdimësi se dhuna nuk ndalet pa u raportuar, pa u trajtuar nga organet kompetente. Rastet e dhunës në familje janë raste të ndjeshme dhe qasja e policisë karshi rasteve të dhunës në familje është si parandalimi për dhunën në njërën anë dhe si dhe trajtimi i rasteve më seriozitet , ka bërë që raste e tilla të vijnë duke u raportuar më shpesh, ndër vite”, u tha nga Zyra për Informim e Policisë së Kosovës.

Rastet e dhunës në familje në secilin stacion policor trajtohen nga zyrtarë policorë që kanë kryer trajnime shtesë. Të njëjtat gjithashtu trajtohen në bashkëpunim të ngushtë me Qendrat për Punë Sociale, Mbrojtësit e Viktimave dhe natyrisht me organet e drejtësisë. Sidomos, raste kur janë të përfshirë fëmijët si viktimë prania e punëtorit të QPS-së është e domosdoshme./FrontOnline