Avdullah Hoti kërkon nga Qeveria e Kosovës që të rrisë subvencionet për bujqit për së paku 25 për qind
Ish-Kryeministri i Kosovës, Avdullah Hoti, i ka bërë thirrje Qeverisë së Kosovës për rritje të subvencioneve ndaj bujqve së paku për 25 për qind.
Ai përmes një postimi në llogarinë e tij në Facebook, ka thënë se në rast se kjo nuk realizohet atëherë përgjatë vitit 2022, “mund të shohim më shumë tokë djerrë dhe ferma të kafshëve që mbyllen”.
“Qeveria urgjentisht duhet të rrisë subvencionet për bujqësi së paku për 25% për të ruajtur nivelin ekzistues të aktivitetit bujqësor në vend. Po aq e rëndësishme për bujqit është që subvencionet të paguhen në kohën kur bujqit duhet të blejnë inputet bujqësore”, ka shkruar Hoti.
Hoti, njëherësh deputet nga radhët e Lidhjes Demokratike të Kosovës, ka theksuar se me rritje të çmimit të inputeve bujqësore, bujqit do ta kenë të vështirë të mbajnë nivelin e prodhimit si në vitin paraprak.
“Sipas Agjencisë së Statistikave, çmimet e inputeve bujqësore, ku hyjnë farërat, plehrat, pesticidet, ushqimi i kafshëve dhe të ngjashme, në tremujorin e fundit të vitit 2021 janë rritur me 25.3 për qind krahasuar me një vit më parë. Për plehrat dhe ushqimin e kafshëve në veçanti, rritja e çmimeve ka qenë shumë më e lartë”, është shprehur Hoti.
