Kryeministri Albin Kurti e ka ripublikuar edhe njëherë letrën që ia dërgoi Sekretari amerikan i Shtetit, Antony Blinken.

“Në anglisht dhe të përkthyer në shqip e keni letrën të cilën e mora dje nga Sekretari Amerikan i Shtetit, z. Antony J. Blinken. Është përmbajtjesore, e mirë dhe që vlen të rilexohet”, ka shkruar Kurti në Facebook.

E ka bërë këtë në ditën kur presioni i shteteve të QUINT-it që Kosova të lejojë organizimin e referendumit të Serbisë brenda territorit të Kosovës u rrit.

Ambasadorët e pesë shteteve mike të Kosovës i shkuan për këtë punë në zyrë atij dhe dyshes tjetër shtetërore, Osmani e Konjufca.

Sekretari amerikan në letrën e tij për kryeministrin potencoi se Amerika e mbështet dialogun Kosovë-Serbi, i cili në qendër ka njohjen reciproke.

Ndryshe, nesër do të mbahet seancë e jashtëzakonshme e Kuvendit.

Zyra e kryeministrit përmes një komunikate për media ka bërë të ditur se në seancë do të nxirret një rezolutë e përbashkët ku shprehet vullneti i deputetëve për mbajtjen e referendumit kushtetues të Serbisë në Kosovë.