Futbolli kosovar vazhdon progresin në çdo segment.
Një lajm i mirë këtë javë erdhi nga UEFA, pasi për herë të parë një katërsheje të gjyqtarëve kosovarë në krye me Genc Nuzën i është besuar drejtimi i ndeshjes së Conference League, ndërmjet skuadrës qipriote Omonoia FC dhe asaj kazake FC Kairat Almaty, që zhvillohet të enjten në orën 21:00.
Asistentë të Nuzës do të jenë Fatlum Berisha dhe Bujar Selimaj, derisa gjyqtar i katërt Visar Kastrati. Kësisoj, Nuza bëhet gjyqtari i parë kosovar që do ta drejtojë një ndeshje të këtij niveli në fazën e grupeve në garat e UEFA-s. Delegimi i gjyqtarëve kosovarë në Conference League, dëshmon punën e mirë që është bërë në futbollin tonë edhe në aspektin e ndarjes së drejtësisë.
E për këtë arritje Nuza e ka falënderuar presidentin e FFK-së, Agim Ademi dhe kryetarin e Komisionit të Gjyqtarëve, Përparim Hasani.
“Sot më kujtohen ditët e para si gjyqtar futbolli, atëherë kur presidenti Ademi më ka dhënë kurajo e mbështetje të parezervë në këtë profesion, prandaj jam krenar që sot në kohën kur unë po bëj hapa të mëdhenj në garat evropiane ai është duke i prirë me shumë sukses FFK-së. Kjo pa dyshim është një arritje e përbashkët e jona, pas një punë të jashtëzakonshme ndërvite. Falënderoj edhe kryetarin e Komisionit të Gjyqtarëve, Përparim Hasani, që po ashtu na përkrah në vazhdimësi drejt arritjeve të mëdha, e po ashtu edhe të gjithë ligjëruesit e UEFA-s e FIFA-s, që nëpërmjet seminareve të ndryshme na ndihmuan të arrijmë këtu. Premtoj se të gjithë do të vazhdojmë të japim më të mirën tonë për ta çuar në nivele sa më të larta futbollin kosovarë”, ka thënë Nuza.
Të rikujtojmë se ka qenë presidenti Ademi që ka instistuar vazhdimisht në instancat e UEFA-s e FIFA-s për avancimin e këtyre gjyqtarëve, falë edhe performancës së tyre të mirë në ndeshjet e deritashme në garat vendore dhe ato ndërkombëtare.
Omonoia FC (CYP) – FC Kairat Almaty (KAZ) | Group H
Referee: Genc Nuza (KOS)
Assistant Referee 1: Fatlum Berisha (KOS)
Assistant Referee 2: Bujar Selimaj (KOS)
Fourth Official: Visar Kastrati (KOS)
UEFA Referee Observer: Kristinn Jakobsson (ISL)
UEFA Delegate: Igor Radojičić (SRB).
