Në 4 komuna ka dalë fitimtare pa balotazh.

E Partia Demokratike e Kosovës është akoma në garë për të triumfuar edhe në tetë të tjera.

Këtë rezultat të përgjithshëm, që doli nga rundi i parë i zgjedhjeve lokale nga kjo parti po e konsiderojnë si rikthim të tyre në skenën politike.

“Sigurisht që ka shumë faktorë, por para se gjithash ka ndikuar fakti se kemi kuadro të mjaftueshëm në PDK për t`u përballë me sfida, kemi pasë kandidatë jashtëzakonisht të mirë. Kurse, ana tjetër është se kemi dhënë shembull në qeverisjet lokale”, theksoi sekretari i përgjithshëm i PDK-së, Bajrush Xhemaili për “Front Online”.

Xhemaili thotë se synojnë të mbajnë pushtetin në ato komuna ku veçse qeverisin. E pretendime për fitore kanë edhe në ato ku janë opozitë.

“Hyjmë në garë me i fitu të gjitha. Kemi rezultatet të mira, Drenasi është larg prej rivalit të tij, Prizreni, Vushtrria, po them në të gjitha pastaj komunat vec që i kemi pasë Kaçanik, Shtime, do t`i mbajmë ato që i kemi pasë”, u shpreh ai për “Front Online”.

Për të arritur këto rezultate, ky nuk e përjashton mundësinë e koalicioneve parazgjedhore.

Vija të kuqe s`është që kanë me ndonjë subjekt.

“Sa i përket koalicioneve ne s`kemi vija të kuqe dhe sigurisht që nuk do të kemi. Sepse nuk është mirë me i vendos vi të kuqe askujt. Do të marrim vendim në organet e partisë”, theksoi ai.

Partia Demokratike e Kosovës ka fituar në Mitrovicë të Jugut, Ferizaj, Han të Elezit dhe Skenderaj.

Ajo është në garë edhe për Dragashin, Drenasin, Klinën, Prizrenin, Vushtrrinë, Malishevën, Shtimen dhe Kaçanikun.