Xhudistët e Kosovës shënuan përparim në renditjen e përgjithshme botërore të xhudos të hënën, falë paraqitjeve mbresëlënëse në Kampionatin Evropian 2021, që u mbajt në fundjavë në Portugali.
Tre prej gjashtë xhudistëve të Kosovës fituan medalje në Portugali, ndërsa dy të tjerët zunë vendet e pesta në kategoritë e tyre përkatëse, duke e shënuar suksesin më të madh të ekipit të xhudos në një turne deri tani.
Ishte një ditë e madhe për xhudon kosovare vërtet, sepse, për më tepër, Kosova u rendit e para në këtë kampionat, duke e mbyllur turneun si shteti me rezultatet më mira nga të gjitha vendet.
Akil Gjakova dhe Laura Fazliu shënuan ngritje në renditjen botërore në kategoritë e tyre përkatëse, derisa Distria Krasniqi, Loriana Kuka dhe Nora Gjakova i ruajtën pozitat e veta paraprake.
Akil Gjakova e fitoi Evropianin për herë të parë në karrierë në kategorinë -73 kilogramë dhe u ngrit nga vendi i 8-të në atë të 7-të.
Nora Gjakova e fitoi medaljen e bronztë në kategorinë -57 kilogramë dhe ngel në pozitën e 4-të.
Ndërsa Laura Fazliu dhe Loriana Kuka zunë vendet e pesta në kategoritë e tyre përkatëse, -63 kilogramë dhe -78 kilogramë.
Fazliu shënoi ngritje të madhe duke lëvizur tetë vende më lart dhe tani renditet e 42-ta në kategorinë e saj.
Kuka ngeli në vendin e 8-të./Express/
