Mësohen edhe katër gjysmëfinalistët e Ligës së Evropës për këtë edicion, raporton Demokracia.com.

Arsenali ka siguruar kalimin tutje pas fitores së thellë në udhëtim te Slavia Praga me rezultat 0:4, pasi ndeshja e parë ishte mbyllur 1:1 në Emirates.

Golat për “Gunners” i shënuan Pepe (18’), Lacazette (21’,77) dhe Saka (24’).

Në këtë përballje për mysafirët “armë” shtesë ishte edhe mesfushori shqiptar, Granit Xhaka që luajti për gjatë gjithë ndeshjes.

Skuadra tjetër angleze, Manchester Unitedi ka prerë biletën për në gjysmëfinale të Ligës së Evropës, pasi mposhti edhe në ndeshjen e dytë Granadën 2:0 (4:0, rez. i përgjithshëm).

Golat për “Djajtë e Kuq” në Old Trafford i shënuan sulmuesi uruguaian, Edinson Cavani (6’) dhe autogoli i Vallejos (90’).

Në mesin e katër skuadrave më të mira të këtij kompeticioni iu bashkua edhe Roma e cila nuk lejoi befasi ndaj Ajaxit.

Giallorosët barazuan 1:1 në Olimpico me holandezët, por ata u kualifikuan tutje për shkak se në ndeshjen e parë fituan 1:2.

Për italianët realizoi Edin Dzeko (72’), ndërkohë për mysafirët “tundi” rrjetën Brobbey.

Gjithashtu, gjysmëfinales iu është bashkuar edhe klubi spanjoll, Villarreali që fitoi edhe takimin e dytë kundër Dinamo Zagrebit 2:1.