Ish-ministri i Shëndetësisë, Ferid Agani, ka bërë apel tek institucionet e Kosovës që të punojnë bashkë për sigurimin e vaksinave kundër Covidit, raporton Front Online.
Agani që me profesion është neuropsikiatër thotë se gjendja me Covid në vend kërkon mobilizimin e të gjithëve në mënyrë që të tejkalohet kjo situatë.
Duke folur rreth lajmeve se ministra të kabinetit qeveritar po angazhohen në fushatën zgjedhore në Shqipëri në kohë pandemie, ai thotë se e tërë energjia politike e pushtetarëve duhet të jetë rreth mirëqenies së qytetarëve, raporton Front Online.
Çdo angazhim tjetër që tejkalon këto përmasa, ai e quan si joserioze.
“Çështja më urgjente tani është sigurimi i vaksinave nga prodhues kredibil. E gjithë energjia politike e bartësve shtetërore duhet të jetë rreth mirëqenies së shëndetit publik për imunizim sa më të shpejtë të qytetarëve, çdo gjë tjetër do të ishte tejet joserioze”, ka thënë ai për Front Online.
Ferid Agani: Ndërrimi i qeverive ka shkaktuar vonesa në sigurimin e vaksinave
Ish-ministri i shëndetësisë dhe neuropsikiatri, Ferid Agani në një prononcim për Front Online ka kritikuar ndërrimin e shpeshtë të Qeverive e sidomos tash në pandemi.
“Por kjo situatë e pandemisë, Ministrinë e Shëndetësisë dhe Qeverinë e ka gjet në gjendjen më të mjerueshme, nuk ka më keq se në një periudhë prej një viti kemi 4 ministra në detyrë”, ka thënë Agani për Front Online.
Agani thotë se është pikërisht ndërrimi I qeverise në pandemi e cila ka shkaktuar vonesa në sigurimin e vaksinave.
“Të kemi ndërrime të Qeverisë në mesin e pandemisë kjo e ka shkaktuar një shkëputje në zinxhirin e qeverisjes dhe ka shkaktuar vonesa të palejueshme të cilat tash po shihen në vonesën e qartë në imunizimin e popullatës dhe në sigurimin e vaksinave”, ka thënë Agani.
Ka qenë edhe vet ministri Arben Vitia i cili ka pranuar se në bisedat që kanë bërë me kompanitë prodhuese të vaksinave, u është thënë se kërkesa për furnizim ka qenë dashur të bëhet më herët.
Ish-ministri i Shëndetësisë: Masat e Qeverisë paradoksale
Me vendim të Qeverisë që nga 7 prilli është mbyllur gastronomia dhe një sërë masash të tjera.
Ish-ministri i Shëndetësisë, Ferid Agani i ka quajtur paradoksale këto masa pasi shumica e vendeve të rajonit tashmë i kanë lehtësuar masat.
“Tash jemi në një situatë paradoksale pasi jemi i vetmi shtet i cili ka ndërmarrë masa ma radikale të mbylljes sa ka motive epidemiologjike profesionale, sa ka politike nuk mund të deklarohem pasi nuk i kam informatat e duhura”, ka thënë Agani për Front Online.
Agani më tutje është shprehur se situata me pandeminë është e ngjashme në gjithë rajonin ku tashmë jemi në valën e tretë të Coronavirusit.
“Situata në vendin tonë e shoh ashtu sikur edhe situatën në rajon, është një trend i një numri të madh të vdekjeve për fat të keq , pra jemi duke u ballafaquar me valën e tretë të këtij infeksioni tanimë edhe me variante të reja të këtij virusi të cilat e komplikojnë situatën”, është shprehur ai.
Cilat janë pasojat që lë Covidi? Tregon neuropsikiatri
Neuropsikiatri i njohur, Ferid Agani për Front Online ka thënë se personat të cilët e kalojnë virusin Covid-19 përveç pasojave që kanë në shëndetin kronik, mund të përballen edhe me pasoja të shëndetit mendorë.
Sipas tij, pasojat mund të jenë afatmesme dhe afatgjata si stresi, vështirësi emocionale të pakontrolluara e të tjera.
“Behet fjalë për komplikime të rrafshit të shëndetit mendor si afatmesme si afatgjata, kjo situatë e stresit kronik e zgjatur tash e një vit me një perspektivë të paqartë të zgjatjes dhe në sipërfaqe kanë dalur edhe ato vështirësi emocionale psikike të cilat përndryshe do të ishin të kontrolluara”, ka thënë neuropsikiatri Agani.
Sipas tij, përveç Coronavirusit pasoja po shkakton edhe mbyllja si masë për të frenuar pandeminë.
“Çdo veprim i ri sikur ky i fundit që ishte për mbyllje e pjesshme, çdo veprim i tillë ngjall përkujtime të ngjarjeve të mëparshme që shkojnë deri te ato të paraluftës dhe të luftës”, ka thënë ai.
Qytetarë të cilët e kanë kaluar Covid-19 shpeshherë shprehin shqetësim si harresë e pasoja të ngjashme./ Front Online/
