Gjatë ditës së sotme në Mitrovicën e Veriut janë sulmuar dy persona, ku njëri nga ta është Milosh Rosiq, vëllau i Marko Rosiq, i akuzuar për vrasjen e politikanit serb Oliver Ivanoviq.
Milosh Rosiq sulmin e sheh më tepër si veprim ndaj familjes së tij dhe jo ndaj tij personalisht.
“Unë e shoh këtë si një sulm ndaj familjes time, jo ndaj meje personalisht. Të gjithë e dinë se çfarë ka ndodhur në vitet e fundit. Ky është persekutim, nuk kemi ku të ulemi as për kafe,” tha Milos Rosiq.
Ndërsa personi tjetër i përfshirë në rrahje, Radomir Simoviq, thotë se sulmuesit mund të jenë shqiptarë pasi që ata sipas tij i kanë mallkuar në gjuhën shqipe.
“Sot, derisa ishim ulur në kafene, tre persona të panjohur u afruan dhe na goditën me shishe në kokë. Ata ndoshta janë shqiptarë, sepse na mallkuan në gjuhën e tyre, ndërsa na rrihnin”, është shprehur Radomir Simoviq, shkruan Kosovo Online.