Ministrja e Drejtësisë, Albulena Haxhiu, ia ka hedhur fajin opozitës për mos-vullnet të zgjedhjes së presidentit, duke thënë se këta të fundit po shpërfillin vullnetin e qytetarëve, derisa e ka pranuar që s’i kanë pasur 80 vota për zgjedhjen e të parit të vendit.
Haxhiu, nëpërmjet një reagimi në ‘Facebook’, ka thënë se në praktikat e mëparshme, presidenti vinte si rezultat i “dhënies së terminaleve doganore, posteve diplomatike a tenderave”.
Zyrtarja e VV’së ia ka lakuar emrin edhe zyrtarit të LDK’së, Agim Veliut, duke e krahasuar rënien e qeverisë si rezultat i shkarkimit të tij nga pozita e ish-ministrit të Punëve të Brendshme me rastin e mbrëmshëm për ndryshimin e Ligjit për Zgjedhjet e Përgjithshme.
“Ata që po thonë se e paskemi provokuar situatën me ligjin sepse votat i keni pasur, janë të njëjtit që thonin se A.Veliu nuk është dashur të shkarkohet se ai veprim e provokoi rrëzimin e Qeverisë anipse dihej që Qeveria s’ka pasur në plan të votohej, po kur u votua ka pasur plan të rrëzohet”, ka deklaruar ndër të tjera ajo.
Postimi i plotë:
Më 14 shkurt, qytetarët kanë votuar edhe për emrin e kandidatit për kryeministër por edhe për emrin e kandidates për presidente.
Ne kemi qenë transparent para qytetarëve. Mesazhi që kanë dhënë qytetarët ishte i qartë. Por ky mesazh e vullnet nuk po përfillet nga opozita. Sërish po injorohet e shkelet.
Ne nuk kemi çfarë t’ju bëjmë atyre që mendojnë që për votën e Presidentit, duhet dhënë terminale doganore, poste diplomatike a tendera.
Ka qenë e qartë. Ne nuk i kemi pasur 80 vota për Presidentin.
Ata që po thonë se e paskemi provokuar situatën me ligjin sepse votat i keni pasur, janë të njëjtit që thonin se A.Veliu nuk është dashur të shkarkohet se ai veprim e provokoi rrëzimin e Qeverisë anipse dihej që Qeveria s’ka pasur në plan të votohej, po kur u votua ka pasur plan të rrëzohet.
Ne nuk i duam zgjedhjet por moszgjedhja e Presidentit e dërgon vendin në zgjedhje prandaj përgjegjësia për këtë i mbetet atyre që e injorojnë vullnetin e qytetarëve dhe e bllokojnë zgjedhjen e Presidentit./Front Online/
