Përfaqësuesit e familjarëve të personave të zhdukur gjatë luftës në Kosovë i kanë bërë thirrje kryeministrit Albin Kurti që të punojnë në zbardhjen e fatit të tyre. Ata kanë kërkuar që nëse është e nevojshme, me këtë çështje të kushtëzohet vazhdimi i dialogut me Serbinë.
Kurse nga ekzekutivi i ri është bërë e ditur se qysh në ditët e para të tij, kanë nisur takimet me familjarët dhe organizatat që merren me këtë çështje.
Marsi dhe prilli janë muajt e përkujtimit të masakrave më të mëdha gjatë luftës së fundit në Kosovë.
Pikërisht në këtë periudhë, familjarët e personave të pagjetur kanë bërë një tjetër thirrje që të zbardhet fati i mbi 1 mijë e 600 personave.
Një apel i tillë është bërë ndaj Lëvizjes Vetëvendosje, së cilës i është kërkuar që t’i mbajë fjalët gjatë qeverisjes së vendit.
“Qeveria Kurti gjithherë edhe gjatë fushatës e ka pasur këtë moto që të zgjidhet problemi i personave të zhdukur dhe gjithsesi duhet të kushtëzojë Serbinë, por nëse është e nevojshme edhe bisedimet për çështjen e personave të zhdukur”, ka thënë Ahmet Grajqevci, kryetar i Këshillit të Familjarëve të Personave të Zhdukur.
Qeveria e udhëhequr nga Albin Kurti thotë se kjo çështje është një nga prioritetet e para të saj.
Ajo, në një përgjigje të shkurtër për KOHËN, ka thënë se veprimet për gjetjen e trupave duhet të vazhdojnë.
“Një nga prioritetet e Qeverisë Kurti II, siç e kemi cekur në vazhdimësi, është çështja e të pagjeturve. Ne që në javën e parë të marrjes së detyrës kemi filluar takimet me familjarët dhe organizatat relevante për ta diskutuar këtë temë. Jemi të angazhuar që procesi i gërmimeve të vazhdojë sa më parë. Do t’ju mbajmë të informuar për çdo zhvillim apo lajm në këtë drejtim”, ka thënë zëdhënësi i Qeverisë, Përparim Kryeziu.
Vazhdimi i gërmimeve në Kizhevak të Serbisë është paralajmëruar të bëhet brenda disa ditësh.
Për këtë qëllim, të enjten është zhvilluar një takim ndërmjet mjekëve ligjorë të Kosovës dhe Serbisë.
Me pjesëmarrjen edhe të Komitetit Ndërkombëtar të Kryqit të Kuq në takim është diskutuar edhe mundësia e sigurimit të imazheve satelitore për disa lokacione në Serbi, të dyshuara si varreza masive.