Kosova është vendi i fundit në Evropën Juglindore që deri të dielën nuk ka pranuar asnjë vaksinë antiCovid.

Në mbrëmjen e 28 marsit kanë arritur edhe dozat e para të vaksinës.

Bëhet fjalë për 24 mijë doza të vaksinës së prodhuar nga AstraZeneca, të cilat Kosova i ka pranuar nga programi COVAX i Organizatës Botërore të Shëndetësisë, shkruan Front Online.

Mirëpo, vetëm një ditë më parë është konfirmuar që Kosova do të furnizohet edhe me vaksina nga Pfizer-BioNTech.

Ish-ministri i Shëndetësisë, Armend Zemaj përmes një postimi në profilin e tij në Facebook, ka njoftuar se ka marrë konfirmimin që nga kjo kompani do të vijnë edhe 100.620 vaksina anti-Covid.

“Nga komunikimi i fundit që arriti sot nga COVAX, ( për sigurimin e radhës së vaksinës Pfizer-BioNTech) komunikim të cilin ia përcolla Ministrit Vitia për ta vazhduar atë zyrtarisht, konfirmohen 100.620 vaksina anti Covid-19 në qershor, për qytetarët e Republikës së Kosovës”, ka shkruar Zemaj.

E, sot në një përgjigje ekskluzive për Front Online pikërisht për këtë çështje janë deklaruar nga Pfizer dhe BioNTech.

Ursa Lakner, një zyrtare e lartë e kompanisë Pfizer, ka thënë për Front Online se kjo kompani është e përkushtuar që të ndihmojë me këtë vaksine, pa dashur të jep më shumë detaje se kur do të vijnë dozat e para të kësaj vaksine në Kosovë.

“Pfizer dhe BioNTech janë të përkushtuar për të sjellë këtë vaksinë për të ndihmuar në përmbushjen e nevojës globale të shëndetit publik”, ka thënë Ursa Lakner për Front Online.

E, pyetur se a do të vijnë të gjitha dozat në të njëjtën kohë ajo ka shtuar se janë duke diskutuar me Qeverinë e Kosovës.

“Ne jemi duke diskutuar me Qeverinë në Kosovë për të siguruar qasje në vaksinë”, është shprehur zyrtarja e lartë e kompanisë Pfizer, Ursa Lakner.

Ndërsa, nuk ka dhënë më shumë detaje kur është pyetur se përpos këtyre dozave a do të vijnë edhe doza të tjera të vaksinave të tjera në Kosovë.

“Bisedimet me Qeverinë janë konfidenciale dhe nuk kemi asgjë për të njoftuar në kohën e tanishme”, është deklaruar Lakner për Front Online.

Vetëm në 24 orët e fundit në Kosovë kanë vdekur 12 persona nga Covid-19, ndërsa nga 5 mijë e 10 mostra të marra 975 raste kanë rezultuar pozitive.

Gjatë 31 ditëve të muajit mars në Kosovë janë konfirmuar 21 mijë e 59 raste të reja me koronavirus, ndërkaq numri i të vdekurve në këtë muaj ka qenë 273.

Sipas statistikave të publikuara nga Instituti Kombëtar i Shëndetësisë Publike të Kosovës në baza ditore, numri i të shëruarve gjatë marsit 2021 ka qenë 14 mijë e 564 persona./Front Online/