Albin Kurti nuk e ka lëkundur qëndrimin e tij. Ai në paraditen e së hënës, pak orë para se të zgjidhej kryeministër, e tha troç në një tryezë se dialogu me Serbinë nuk është në mesin e prioriteteve të tij qeverisëse. Më me rëndësi për të gjatë mandatit janë çështjet që lidhen me punësimin e drejtësinë.

Me qasjen e tij s`po pajtohen njohësit e zhvillimeve politike në vend. Shkodran Ramadani është njëri nga ta. Ky në një prononcim për Front Online tha se dialogu me Serbinë, deshi apo s’deshi Kurti, do të jetë prioritet për të si kryeministër.

“Dialogu është një temë që Kurti nuk mundet t’a injorojë. I imponohet si kryeministër i Kosovës. Nëse ai refuzon dialogun, mbështetja e ndërkombëtarëve, angazhimi i tyre për zgjidhjen e kontekstit, Kosovë-Serbi, do të zbehet. Kosova do të izolohet”, tha Ramadani për Front Online.

Njëjtë mendon edhe Allen Meta nga organizata “Demokracia në Veprim”.

Ai tregon se pse Kurti nuk mund t`i ikë procesit tashmë 10 vjeçar për normalizimin e marrëdhënieve ndërmjet Kosovës dhe Serbisë.

“Padyshim, dialogu sado që mund të thuhet para qytetarëve se nuk do të jetë një prej prioriteteve, ai doemos do të jetë. Është i pashmangshëm sepse BE-ja dhe Amerika janë të interesuara t’a rregullojnë çështjen e status-quo mes Kosovës dhe Serbisë”, theksoi Meta për Front Online.

Dialogun, Kurtit, një ditë pas uljes në kolltukun e kryeqeveritarit ia kanë kujtuar edhe dy diplomatë ndërkombëtarë të rangut të lartë.

Së bashku me urimet e tyre, përfaqësuesi i Politikës së Jashtme të Bashkimit Evropian, Joseph Borrel dhe i dërguari i BE-së për dialogun Kosovë-Serbi, Miroslav Lajçak, kanë thënë se mezi presin të bashkëpunojnë me Kurtin për normalizimin e raporteve Kosovë-Serbi.

Por, çfarë duhet të kërkojë i pari i ekzekutivit në dialog?

Të dy njohësit, si Ramdani e Meta, thonë se Kurti duhet të kërkojë njohje prej Serbisë dhe po ashtu shmangie nga krijimi i Asociacionit.

“Dialogu politik i cili duhet të jetë domosdo pa ndryshimin e hartave dhe pa krijimin e Republikave të vogla në të dyja shtetet që më pastaj do të mund të krijonte një Republikë Srpska. Njohja është e domosdoshme. E kemi parë që edhe Amerika në krye me Biden e ka kërkuar atë”, deklaroi Meta për Front Online.

“Kurti duhet të jetë rigoroz. Duhet të kërkojë njohje, por pa Asociacion dhe pa ndarje. Për shkak se çdo gjë tjetër do të ishte humbje për neve”, u shpreh Ramadani për Front Online.

Emisari special i BE-së në Mirosllav Lajçak në një intervistë për “N1” ka thënë se pret që takimi Kurti-Vuçiq të ndodh para verës.

Deri më tani janë arritur mbi 23 marrëveshje në dialogun mes të dyja vendeve në nivelin teknik dhe politik.

Por, jo të gjitha marrëveshjet e arritura janë zbatuar nga palët./Front Online/