Gjithsej 12 deputetë që morën poste ekzekutive në Qeverinë Kurti 2 kanë humbur mandatet e tyre në Kuvend. Të njëjtit pritet të zëvendësohen nga kandidatët e radhës për t’u ulur në karriget e legjislativit. Prej tyre, nëntë janë nga Lëvizja Vetëvendosje dhe tre nga komunitet jo shumicë. Ndërkohë, pasditen e sotme, ushtruesi i detyrës së presidentit, Glauk Konjufca ka dorëzuar kërkesën në KQZ për zëvendësimin e tyre.
Zëdhënësi i KQZ-së, Valmir Elezi thotë për KosovaPress se nesër pritet të mblidhen për të bërë rekomandimin e kandidatëve të radhës për zëvendësim në Kuvend.
Elezi: KQZ ka pranuar kërkesën nga u.d. presidentit për zëvendësimin e deputetëve
“KQZ ka pranuar kërkesën nga ana e ushtruesit të detyrës së presidentit së Kosovës për të bërë rekomandimin e kandidatëve të radhës për të zëvendësuar deputetët e deritanishëm, që kanë marrë funksione në ekzekutivin e vendit. Besojmë që gjatë ditës së nesërme KQZ do të mblidhet për të bërë rekomandimet përkatëse për secilin prej këtyre kandidatë”, tha ai.
Humbjen e mandateve të 12 deputetëve e konfirmon edhe Eugen Cakolli nga Instituti Demokratik i Kosovës (KDI), i cili thotë posa kanë marrë detyrat në Qeverinë Kurti 2, automatikisht iu kanë pushuar mandatet në Kuvend.
Cakolli: Pasi votimit të qeverisë, 12 deputetë kanë humbur mandatin
“Pas votimit të votimit të qeverisë gjatë ditës së djeshme, 12 deputetë kanë humbur mandatin e tyre për shkak se me Kushtetutë përcaktohet se nëse një deputet merr një post ministror, atij i pushon mandati…Janë 12 deputetë, prej të cilëve 3 janë nga subjektet e komuniteteve, përkatësisht një nga komuniteti egjiptian, boshnjak, turk. Pjesa tjetër janë nga lista e Lëvizjes Vetëvendosje, e cila do të zëvendësoj kandidatët në fjalë”, tha ai.
Sipas tij, njëra nga deputetët që pritet të zëvendësohet është nga Lista Vjosa, kështu do të jetë sërish mundësia për formimin e grupit parlamentar nga e njëjta.
Cakolli: Lista Vjosa sërish pritet të ketë mundësinë për formimin e grupit parlamentar
“Një nga kandidatët që do të zëvendësohet është nga Lista Vjosa. Kjo i bie që do të humbë dy deputetë, por do të fitojë një deputet të ri, duke mbajtur ende te pragu prej 6 deputetëve sa nevojitet për grup parlamentar nëse eventualisht do të ketë vullnet politik për një gjë të tillë”, tha ai.
Deputetët që kanë humbur mandatet si pasojë e marrjes së detyrave ekzekutive janë: Donika Gërvalla-Schwarz, Arben Vitia, Hekuran Murati, Faton Peci, Liburn Aliu, Arbërie Nagavci, Hajrulla Çeku, Rozeta Hajdari, Xhelal Sveçla, Fikrim Damka, Elbert Krasnqi dhe Emilja Rexhepi.
Ndërsa të njëjtit pritet të zëvendësohet nga Lëvizja Vetëvendosje janë: Shqipe Isufi, Enver Haliti, Mirsad Shkreta, Gramos Agusholli, Alban Bajrami, Yllza Hoti, Jahja Kokaj, Hydajet Hyseni. Ndërsa nga Lista Vjosa është Gresa Bytyqi, nga komunitetet jo shumicë, Enis Kervan nga Partia Turke, Fridon Lala nga partia egjiptiane dhe Samra Ilijazi nga ajo boshnjake.
