Ankesat e subjekteve politike të cilat nuk u certifikuan të premten e javës së kaluar nga KQZ do të marrin përgjigje sot.

Është Paneli Zgjedhor për Ankesa dhe Parashtresa (PZAP) që do të vendos nëse do t`i aprovojë apo hedhë poshtë ato.

Ehat Miftaraj nga Instituti i Kosovës për Drejtësi tha për Front Online se ky institucion duhet t`i certifikojë listat e partive, por pa personat të cilat kanë probleme me ligjin.

Ai përmend kornizën ligjore që obligon një gjë të tillë.

“Në bazë të ligjit për zgjedhje, e në bazë të aktgjykimit të Gjykatës Kushtetuese, PZAP sot kryesisht ka mundësi të certifikojë listat e partive politike, por duke përjashtuar personat të cilët janë të papërshtatshëm në bazë të nenit 29 të ligjit për zgjedhje. E përsëris gjithmonë nëse PZAP i respekton parimet e sundimit të ligjit, obligimet ligjore që i ka në zbatimin e Gjykatës Kushtetuese, ky institucion do të duhet të certifikojë, listat e partive politike pa personat të cilat kanë probleme me ligjin”, u shpreh Miftaraj për Front Online.

Megjithatë në rast se subjekteve nuk u pëlqen ky vendim, sipas tij, ato kanë të drejtë ankimimi në Gjykatën Supreme.

“PZAP është organ administrativ vendimet e të cilit janë të apelueshme në Gjykatën Supreme. Personat ose partitë politike të cilët nuk certifikohen kanë të drejtë të paraqesin ankesë në këtë Gjykatë”, deklaroi Miftaraj për Front Online.

Ky organ pastaj është i obliguar që deri me 30 janar të marrë një vendim dhe ta informojë KQZ-në./Front Online/