I bllokuar, i plagosur dhe i sulmuar në Kosovë

Algjeriani i bllokuar në Kosovë ka shpjeguar tmerrin që po përjeton, ndërsa thotë se nuk është në gjendje të lëvizë, se ai ka qenë viktimë e një sulmi dhe tani jeton me ndihmën e disa bamirësve.

Situata e këtij të riu, i cili hyri ilegalisht në Evropë, është me të vërtetë kritike, shkruan mediumi algjerian. Ne mund të shohim qartë në video shkallën e egërsisë me të cilën ai u sulmua, por edhe shqetësimin në të cilin ai jeton, dhe ne lehtë mund ta mendojmë dëshirën e tij të vetme, që është të kthehet në vendin e tij.

Mohamed Soussi vazhdon ta shpjegojë situatën e tij dhe tregon se ai jeton falë ndihmës së një grupi algjerianësh që i sollën lëng frutash dhe që e fshehën në një dhomë lutjesh, në mënyrë që atë të mos e gjejnë sulmuesit e tij, të cilët me sa duket e ndjekin ende.

Një thirrje për autoritetet e vendit të tij

I frikësuar dhe i lodhur, i riu Mohamed Soussi, i cili u largua nga Skikda dhe përfundoi i bllokuar në Kosovë, u bën thirrje të dëshpëruar autoriteteve algjeriane që ta kthejnë më në fund në vendin e tij dhe të “pushojë”, transmeton Gazeta Express.

“Unë kërkoj nga autoritetet algjeriane të ndërhyjnë dhe të më kthejnë në vend. Kjo është gjithçka që unë kërkoj. E gjitha”, thotë ai.

Një mesazh më i saktë nga ai iu dërgua ministrit të Punëve të Jashtme në Algjeri, Sabri Boukadoum.

“Unë i kërkoj ministrit të Jashtëm, Boukadoum, të më çojë në shtëpi, për hir të Zotit, sepse nuk mund të duroj më!”.