Ndërmjet 11 e 12 janarit të vitit 1984, Rexhep Mala e Nuhi Berisha ranë heroikisht gjatë përleshjes me forcat policore serbe në Kodrën e Trimave në Prishtinë.
Fillimisht, me iniciativën e Rexhep Malës dhe të bashkëveprimtarëve të tjerë, formohet Komiteti i Studentëve në kuadër të Grupit Revolucionar, i cili do t’i shërbente Lëvizjes Çlirimtare të Shqiptarëve si bërthamë e parë për lëvizjen e pranverës studentore të vitit 1981.
Rexhep Mala dhe Nuhi Berisha provuan të vihen në themelet e një organizimi të lëvizjes çlirimtare, që vepronte në vazhdimësi, kurse në vitin 1973 filluan veprimtarinë e tyre në botimin e gazetës “Zëri i Kosovës”.
Rexhep Mala e Nuhi Berisha shquhen ndër figurat më të ndritura të qëndresës dhe sakrificës sonë kombëtare.
Sot për veprën patriotike të Rexhep Malës me plot krenari flasin bashkëpunëtorët, bashkëluftëtarët, bashkëfshatarët dhe mbarë Kosova, ndërsa emrat e Rexhep Malës e Nuhi Berishës i hasim në shumë rrugë të cilat me nderë e krenari mbajnë emrat e tyre, i hasim në shumë sheshe e vatra edukativo-arsimore. Po ashtu, edhe kazerma e qytetit në Gjilan me krenari mban emrat e Malës dhe Berishës.
Rexhep Mala dhe Nuhi Berisha kishin vizion të qartë për të ardhmen e Kosovës dhe guximin e duhur për të vepruar kundër regjimit të atëhershëm.
Rexhepi e Nuhiu vlerësohen si dy nga figurat qendrore të rezistencës dhe përpjekjeve të popullit shqiptarë të Kosovës për liri e pavarësi dhe janë çmuar për trimërinë, sakrificën e lartë dhe aftësitë organizative.
