Gjykata Kushtetuese e Kosovës sot ka shpallur aktgjykimin e plotë i cili e shpall jokushtetues votimin e Qeverisë Hoti. Rrjedhimisht, nga sot vendi mund të shkojë në zgjedhje,

Pas publikimit të aktgjykimit të plotë nga Gjykata Kushtetuese, ushtruesja e detyrës së presidentit të vendit, Vjosa Osmanit, do të shpallë datën e mbajtjes së zgjedhjeve të parakohshme.

Komisioni Qendror Zgjedhor është duke pritur vendimin e ushtrueses së detyrës së Presidentit, Vjosa Osmani për caktimin e datës së zgjedhjeve.

Zëdhënësi i KQZ-së Valmir Elezi ka thënë për KosovaPress se pasi të shpallet data, do të mblidhet KQZ-ja për të marrë vendimet e para në kuadër të përgatitjes së këtyre zgjedhjeve.

“KQZ-ja, fillimisht vendos për caktimin e afateve të aktiviteteve zgjedhore, duke i shkurtuar këto afate dhe përshtatur me ditët që do t’i kemi në dispozicion për përgatitjen e zgjedhjeve si dhe do të miratohet plani operacional, ku janë të listuara të gjitha aktivitetet që do të kryhen nga KQZ-ja që nga dita e parë dhe deri në përmbylljen e procesit zgjedhor”, ka thënë Elezi për KosovaPress.

Gjykata Kushtetuese gjatë ditës së sotme shpalli aktgjykimin e plotë mbi ligjshmërinë e Qeverisë Hoti.