“Enver Hoxhaj nuk ka nevojë të vijë në Mitrovicë sepse mitrovicasit nuk e duan më Partinë Demokratike të Kosovës”.
Kjo është kundërpërgjigja e kryetarit të Mitrovicës së Jugut, Agim Bahtiri ndaj deklaratës së kandidatit për kryeministër nga radhët e PDK-së, Enver Hoxhaj.
Hoxhaj të martën gjatë qëndrimit në Mitrovicë ka thënë se Mitrovica është shndërruar në qytetin më të varfër nga kryetari më i pasur.
“Enver Hoxhaj e din shumë se qysh e kanë lënë Mitrovicën dhe se Agim Bahtiri nuk e ka varfëruar Mitrovicën, por e ka gjet tepër të varfër dhe të shkatërruar tërësisht dhe të ndarë nga PDK-ja. Dhe kjo, do të thotë që ai nuk ka pas nevojë të vijë në Mitrovicë, dhe s’ka pse me ardhë në Mitrovicë për arsye se Mitrovica dhe mitrovicasit nuk e duan më PDK-në sepse e ka shkatërrua në tërësi”, ka thënë Bahtiri, për FrontOnline.
E, duke iu përgjigjur kritikave të Hoxhajt, Bahtiri ka thënë se me të marrë udhëheqjen e Mitrovicës nuk ka gjetur asgjë të mirë, pos kontrabandë, pasiguri e shkatërrim.
“Mitrovicën e kam gjet me gjemba, e kam gjet një kontrabandë fuqishëm që janë pasurua njerëzit e tij dhe e kam gjet një Mitrovicë të shkatërruar në mënyrë ekonomike ku të gjitha kompanitë që pas luftës kanë qenë funksionale i kanë shkatërruar, i kanë falimentuar dhe i kanë privatizuar , vetëm këqyrë në Trepçë se kënd e ka tani drejtor dhe e dimë se cila është ekonomia e tyre dhe politika e tyre”, është shprehur ai.
Ndërsa, ka deklaruar se Mitrovica është qyteti i qytetarëve që e ka një kryetar shërbëtor për ta.
Ai për Front Online është shprehur i bindur se PDK-ja nuk do të udhëheqë më asnjëherë me qytetin e Mitrovicës.
“Mitrovica nuk është më e PDK-së dhe nuk ka me qenë asnjëherë e PDK-së për arsye se qytetarët e dinë çka kanë hjek prej PDK-së me një korrupsion të paparë, me një kriminalitet të paparë dhe me një pasiguri të paparë dhe tani që Mitrovica që udhëhiqet prej një njeriu evropian , një njeri q ka krijuar stabilitet dhe një njeri që po kërkon investime çdo ditë dhe Mitrovica e ka një kryetar që nuk do ta ndërron për shumë mandatë tjera”, ka shtuar Bahtiri për Front Online.
Tashmë, kur edhe vendi do të mbajë zgjedhjet e parakohshme parlamentare, kandidatët për kryeministër nga subjektet politike kanë filluar fushatën nëpër qytete të ndryshme, ani pse ende nuk është caktuar data e zgjedhjeve dhe fushata nuk ka filuar zyrtarisht./FrontOnline/