Kanabisi sjellë fitime të paligjshme për një pjesë të madhe të shoqërisë në Shqipëri, duke filluar nga fshatarët që kultivojnë bimën e deri tek grupet e krimit të organizuar që e transportojnë atë jashtë kufijve dhe e shesin në vendet e Bashkimit Evropian (BE).
Në kulmin e kultivimit, periudhën 2016–2017, llogaritet se kanabisi solli 2.2 miliardë euro.
Kështu thuhet në raportin e Nismës Globale Kundër Krimit të Organizuar me titull: “Prurjet Financiare të Paligjshme në Shqipëri, Kosovë dhe Maqedoninë e Veriut”, i botuar në gusht të vitit 2020. Aty potencohet fakti se kanabisi i kultivuar në Shqipëri trafikohet përtej kufirit në Kosovë për përdorim të brendshëm dhe për transportim në vendet e Bashkimit Evropian. Krahas kësaj, e njëjta bimë, kalon në Maqedoninë e Veriut, prej nga kryesisht më pas orientohet drejt tregjeve turke, bullgare dhe rumune.
Gazetari Lavdrim Lita ka shpjeguar për “Front Online” edhe një tjetër skemë. Tregon se kanë pasur raste të trafikut të parave të pista nga Belgjika në Shqipëri. E gjitha kjo bëhet përmes makinave që sillen kinse për t’u shitur, mirëpo që në fakt, siç thotë ai, brenda tyre bëhen paketime të miliona eurove. Paratë e tubuara në këtë formë, Lita pohon se investohen në sektorin e ndërtimit që përbën 10 % e ekonomisë së Shqipërisë.
“Ndërsa në Tiranë ka mbi 6 mijë apartamente të pashitura, volume i lejeve të dhëna nga Bashkia Tiranë vitet e fundit kapin shifrën e 1 milion metra katrorë, pra, një shifër përtej kërkesës dhe ofertës. Thjesht skema e përdoruar nga Mafia në Itali dhe Spanjë, investime në beton dhe prona të patundshme”, shprehet ai.
Megjithatë grupet shqiptare nuk janë në nivele të larta në hierarkinë e trafikut ndërkombëtar. Lita shpreh kështu kur krahason këto grupe me organizatat e fuqishme të tjera: Ndrangheta italiane, Bratva ruse apo Triadat kineze. Këto të fundit kontrollojnë portet e Evropës dhe kontinetit aziatik.
”Megjithatë sapo janë ngjitur në superligë dhe po formojnë kartelet e para. Pra, grupe kolektive siç ishte rasti i kartelit shqiptar me seli në Dubai”, pohon Lita.
Mbi 2 miliardë € fitimet vjetore nga kanabisi në Shqipëri, Rama nuk i luftoi grupet kriminale
