Në ditën e parë të punës pas votimit në Kuvend të Ligjit për Rimëkëmbje Ekonomike, shumë qytetarë kanë shkuar menjëherë në Trustin e Kursimeve Pensionale. Ata interesohen për shumën e parave që mund të tërheqin nga Trusti, siç parashihet në këtë ligj. Nevojat e tyre janë të ndryshme.
“Po janë 1.200 euro ashtu diçka. E ta shohim, me këto sëmundje që kemi, duhet t’i harxhojmë”, shprehet Vehbi Gërbeshi, minator i dalën në pension.
“Po kam menduar dhe do t’i shfrytëzojë për të mirat familjare”, thotë Nazmi Leci, mësues.
Sipas Ligjit, tërheqja e parave nga Trusti mund të bëhet deri në 10% të parave të kursyera. Kushdo që ka deri në 10 mijë euro dhe i tërheq 1 mijë euro, shteti do t’ia rikthejë, por jo edhe atyre që kanë mbi 10 mijë euro.
Për njohësit e çështjeve ekonomike, kjo nuk pritet të ketë ndonjë ndikim në ekonomi, e cila nga rritja vjetore në 4%, sipas FMN-së, ka pësuar ulje drastike në 9%.
“Pasi janë rreth 20% të kontribuuesve të Trustit Pensional të cilët do t’i marrin nga 1 deri në 10 euro. Ndërsa 50% e tyre nga 640 mijë sa janë në total, do të marrin deri në 100 euro. Pra vlera e parave që do të hyjnë në treg te shumica e kontribuuesve do të jetë shumë e vogël. Vetëm 2% e kontribuuesve do t’i marrin 2 mijë euro ose më shumë nga kontributet”, thotë Lavdim Hamidi, njohës i çështjeve ekonomike.
E pavarësisht shumës që mund të marrin, interesimi i qytetarëve për të ditur se sa para i kanë në Trust e sa mund t’i tërheqin, vazhdon të rritet.
Në anën tjetër zyrtarë të Trustit të Kursimeve Pensionale kanë deklaruar se qytetarët nuk kanë nevojë të brengosen për shkak se shumë shpejt ata do të dalin me platformën e cila u mundëson atyre tërheqjen e këtyre mjeteve sipas ligjit”.
Aktualisht Ligji për Rimëkëmbje Ekonomike është nënshkruar nga ushtruesja e Detyrës së Presidentes dhe pritet publikimi në Gazetën Zyrtare. Pastaj qytetarët duhet të aplikojnë vetëm online për tërheqje të 10% të kursimeve të tyre. Të drejtë aplikimi kanë kushdo që ka para në Trust, por vetëm shtetasit rezident në Kosovë.
