Ministrja e Kulturës, Vlora Dumoshi mori pjesë në aktivitetin e Muzeut Kombëtar, me rastin e Ditës Ndërkombëtare të Trashëgimisë Audio-Vizuele.

Dumoshi shkruan se trashëgimia audio-vizuele është pjesë integrale e identitetit të një vendi dhe thesar i kujtesës kolektive.

Ky është postimi i saj i plotë:

Me shumë kënaqësi mora sot pjesë në aktivitetin e organizuar në Muzeun Kombëtar të Kosovës, me rastin e Ditës Ndërkombëtare të Trashëgimisë Audio-Vizuele.
Kjo ditë shënohet çdo 27 tetor dhe është përzgjedhur si e tillë nga UNESCO më 2005, në mënyrë që të ngritet vetëdija dhe rëndësia e ruajtjes së dokumenteve audio-vizuele (filma, zëra, video incizime si dhe programe radio televizive)

Trashëgimia audio-vizuele është pjesë integrale e identitetit të një vendi dhe si e tillë konsideroj që duhet të jetë prioritet si për institucionet ashtu edhe për mediat dhe për organizatat që merren me çështjet e trashëgimisë.
Arkivat audio-vizualë janë një thesar i kujtesës kolektive dhe një burim i çmuar i dijes dhe si të tilla reflektojnë diversitetin kulturor, social e linguistik të shoqërive tona. Një pjesë e madhe e trashëgimisë botërore audio-vizuele ka humbur, si pasojë e neglizhencës, shkatërrimit apo mungesës së burimeve dhe aftësive për ta ruajtur si të vlefshme. Për këtë arsye sot ky segment duhet të jetë prioritar për të gjitha institucionet e kulturës në nivel kombëtar e ndërkombëtar.
Në eventin e sotëm ndoqëm rrëfimin e një nga grave të mbijetuara të dhunës seksuale gjatë luftës, plagë e hapur e shoqërisë kosovare. Është shumë e rëndësishme që trashëgiminë tonë audio-vizuele të periudhës para gjatë dhe pas luftës në Kosovë ta ruajmë përmes shumë mekanizmave dhe të mos e lëmë në harresë meqë do të na shërbejë ta njohim më mirë historinë dhe rrjedhat nëpër të cilat ka kaluar Kosova këto vite.