Ditëve të fundit janë shtuar zërat se Partia Demokratike e Kosovës do t’i bashkohet koalicionit qeverisës LDK-AAK-Nisma.

Mundësitë u shtuan pas deklaratave të Isa Mustafës se partia e tij i ka hequr vijat e kuqe ndaj partisë së Kadri Veselit.

Por, këtë ide të tij nuk po e përkrahin bashkëpartiakët e Mustafës.

Deputetja e LDK-së, Valentina Bunjaku në një prononcim për Front Online, thotë se është kundër hyrjes së PDK-së në Qeveri.

Ajo tha se për këtë qëndrim ka shumë arsye.

“Unë mendoj se PDK nuk duhet me u përfshi në Qeveri, ka shumë arsyeje pse PDK nuk duhet me u përfshi në qeveri”, tha shkurt Bunjaku për Front Online.

Ndërsa për mendimin e kundër që ka me kryetarin e LDK-së, Isa Mustafa, për futjen e PDK-së në Qeveri, deputetja Bunjaku tha se nuk pret që të penalizohet nga kryetari i saj,  pasi që siç tha ajo,  Mustafa i penalizon ata që veprojnë ndryshe LDK-së, dhe jo ata që kanë mendim të kundërt.

“Nuk e penalizon isa Mustafa asnjëherë askënd që e thotë mendimin ndryshe, por atë që vepron ndryshe”, tha Bunjaku.

Ajo foli edhe për votimin e Projektligjit për Rimëkëmbjen Ekonomike, i cili nesër për herë të gjashtë do të hedhet për votim, pasi që deri më tani nuk ka arritur të votohet për shkak se Qeveria nuk i ka 61 vota sa duhen për kalimin e Projektligjeve.

Bunjaku tha se nesër në seancë do të shihet nëse i kanë numrat për kalimin e këtij Projektligji.

“A i kena numrat e shohim nesër. Në rast se nuk kalon Projektligji duhet të ulemi si grup parlamentar me diskutu. Ende nuk kemi diskutuar për këtë, por unë mendoj se nesër kalon”, u shpreh ajo për Front Online.