Njohësi i çështjeve politike, Ramush Tahiri, thotë se përfshirja e PDK-së në qeveri i jep stabilitet vendit.
Tahiri thotë se më mirë në këto momente është të formohet një koalicion i madh, se sa të shkohet në zgjedhje.Ai tutje shton se prezenca e PDK-së në koalicion, me 24 vota, i jep vullnet qeverisë të punojë më shumë.
“Shyqyr që janë heq vijat e kuqe dhe s’duhet me pas vija të kuqe partitë me njëra-tjetrën. Ato kanë programe që i dallojnë por nuk janë krejt të papjtueshme sa kur vjen njëra parti në pozitë tjetra me qenë në opozitë. Unë jam përkrahës i idesë që me ba gati programet, që kur të hyjnë në qeveri me pasë numrat e sigurtë, ndërsa stabilitetin programor me e harmoznizu në programin qeverisës. Kjo që kemi vija të kuqe që kemi mospajtime që kemi akuza me njëri-tjetrin, kjo është politikë e hasmërisë, nuk është në rregull për mua. Mirë është që tani që kanë hequr vijat e kuqe, për mendimin tim, e zgjerojnë edhe koalicionin dhe nuk e qojnë vendin në zgjedhje. Me hy PDK-ja me 24 deputetë në koalicion e stabilizon këtë qeveri edhe i jep më shumë vullnet për me punu”Tutje ai shton se zgjedhjet në këto momente nuk prodhojnë diçka të re.Ai potencon se pa u ndërru sistemi zgjedhor, rezultati në fund do të jetë i njëjtë.
“Më mirë është bëhet një koalicion i madh sesa të shkohet në zgjedhje sepse zgjedhjet nuk prodhojnë diçka të re, sepse elektorati është i shpërnda kështu si është. Pa u ndërru sistemi zgjedhor ne kot shkojmë në zgjedhje, këtë rezultat kemi” tha Tahiri për Gazeta Blic.
Qeveria Hoti ka një shumicë të brishtë, ç’ka nuk i jep luksin të ketë numrat e nevojshëm për të kaluar një sërë projektligjesh të rëndësishme.Ligji për Rimëkëmbjen Ekonomike ka dështuar të kalojë në Kuvend për herën e pestë me radhë.Ndërsa nga PDK-ja, kanë mohuar se kanë patur takime me LDK-në sa i përket një bashkëpunimi të mundshëm.