Pushimet shkollore të vjeshtës në shumicën e kantoneve të Zvicrës fillojnë nesër. Gjatë këtyre pushimeve lista federale e karantinës pritet të riaktualizohet, siç ka raportuar portali i udhëtimit “Travelinside”.

Kriza e koronavirusit nuk i pengon shumë zviceranë që të shijojnë diellin e jugut për një ose dy javë, edhe këtë vjeshtë.

Pushimet e vjeshtës janë tradicionalisht ndër periudhat më të rëndësishme të udhëtimit për zviceranët, transmeton albinfo.ch. Por udhëtimet jashtë vendit janë bërë më të vështira për shkak të koronavirusit.

Kanë mbetur vetëm disa destinacione ku mund të udhëtohet lehtë por problemi është se pikërisht rruga për këto destinacione sa shkon e po bëhet më e shtrenjtë.

Si për shembull, Kosova. Zëdhënësi i Edelweiss Andreas Meier ka thënë për median e përmendur: “Për shkak se është hequr detyrimi i karantinës për udhëtarët nga Kosova në Zvicër, kërkesat në Edelweiss për fluturime drejt Kosovës janë rritur shumë”.

Por edhe pavarësisht kësaj, kërkesa tradicionalisht është më e lartë në sezonin e festave të vjeshtës gjithsesi, përcjell albinfo.ch. Për pasojë, sipas edelweis “pasi çmimet te ne për të gjitha destinacionet bazohen në ofertë dhe kërkesë, është e qartë se çmimet e fluturimeve për Kosovën janë më të larta”.

Çmimet po rriten edhe në kompaninë tjetër të madhe turistike, Kuoni. Arsyeja për këtë është kërkesa për rezervime afatshkurtra, transmeton albinfo.ch. Për shkak të numrit të zvogëluar të fluturimeve, vendet ngadalë po pakësohen, veçanërisht gjatë fundjavave, thonë në këtë kompani.