Naser Osmani i LDK-së, do të jetë prapë kandidat për deputet, për kundër aktakuzës që ka dhe përkundër paralajmërimit që kandidatja për kryeministre e LDK-së, Vjosa Osmani, bëri duke thënë se njerëzit me aktakuza do të lihen jashtë listës së kandidimit nga LDK-ja.
Naser Osmani, në një përgjigje për Gazetën NewBorn, ka thënë se është në listë dhe se vota e popullit vendos.
Kur është pyetur se a e ka hequr LDK-ja nga lista e kandidimit për deputet për zgjedhjet e 6 tetorit, Osmani është shprehur shkurt ”Jo, jo. Vota e popullit vendos”, tha Naser Osmani.
Por mos pajtime për vënien e Osmanit në listën për deputet nga LDK-ja, ka shumë brenda këtij subjekti.
Naser Osmani dhe Atdhe Gashi akuzohen për keqpërdorim me fondin 3 për qind, ku dyshohet se kishin tërhequr mbi 800 mijë euro, gjatë periudhës 2006-2012, derisa nuk ka dëshmi për mënyrën e shpenzimit të mbi 150 mijë eurove.
Mandatarja për kryeministre nga Lidhja Demokratike e Kosovës, Vjosa Osmani, sot në një tubim ka deklaruar se në listën e tyre për deputetë, nuk do të ketë asnjë person me aktakuzë.
