Numri i të infektuarve në tri javët e fundit nga pandemia COVID-19, ka shënuar rënie nga 10 deri në 30 për qind. Komunat me popullsinë më të madhe po shënojnë numër më të madh të të infektuarve për dallim nga komunat e mesme dhe të vogla.
Kështu thotë për KosovaPress, drejtori ekzekutiv i Asociacionit të Kosovës, Sazan Ibrahimi, i cili ndër të tjera tregon që situata është e menaxhueshme në nivelin lokal.
Sipas tij, në takimin e djeshëm të komitetit antiCOVID-19, është konstatuar që në krahasim me javët paraprake, në këto të fundit ka pasur rënie deri në 30 për qind të të infektuarve.
“Numri i të infektuarve nga COVID-i është në rënie e sipër. Dhe është konstatuar që në nivelin lokal kjo përqindje është prej 10-30 për qind, varësisht prej komunave. Por, shihet që në komunat e mëdha niveli apo përqindja e të infektuarve në raport me komunat e mesme apo të vogla është pak më i ngritur. Por situata në nivel lokal është e menaxhueshme. Këtë e kanë konstatuar edhe kryetarët e komunave, por edhe drejtorët komunalë të shëndetësisë, të cilët kanë punuar shumë që të mos ngarkojnë qendrën kryesore spitalore”, tha ai.
Ibrahimi thotë se kanë diskutuar idenë e lehtësimit të masave, por meqë me 14 shtator pritet fillimi i vitit të ri shkollor, komiteti antiCOVID-19 ka vendosur që masat tani për tani të mos lehtësohen. Megjithatë ai tregon se pas dy apo tri jave do të rishikohen këtë masa.
Ndër tjera, ai tregon se komunat janë të gatshme për fillimin e vitit të ri shkollor. Nëse një shkollë në një komunë të caktuar nuk i plotëson kriteret, Ibrahimi thotë se nuk do të bllokohet mësimi në tërë territorin.
Ai ka folur edhe për testimin e mësimdhënësve, derisa shton se ky proces është kryer në Prizren dhe është duke vazhduar në Dragash, Istog, Pejë dhe Ferizaj.
“Është konstatuar që do të jetë një mostër nga 1000 deri në 1500 mësimdhënës në tërë territorin e Kosovës, duke e ndarë në kuptimin si shtatë rajone. Nga dy në tri komuna në një rajon do të testohen. Listat do të dërgohen nga Drejtoria e Arsimit. Varësisht nga madhësia e komunës, nga 50 deri në 80 apo 100 mësimdhënës do të testohen. Dhe në përgjithësi do të testohen rreth 1500 nga mbi 20 mijë mësimdhënës në Kosovë, në mënyrë që të gjendet një përqindje se sa mund të jetë numri i mësimdhënësve të infektuarve”, shprehet Ibrahimi.
Sazan Ibrahimi njofton se testimi për COVID-19 do të bëhet në 15 komuna. Ndër tjera, ai thotë se ka gatishmëri të disa komunave për testime serologjike, sipas tij niveli qendror ka shprehur gatishmëri për përkrahjen e komunave që të ofrojë disa testime falas.
“Disa nga komunat janë të gatshme, mirëpo kanë hasur në procese burokratike sa i përket marrjes dhe blerjes së testeve serologjike nga ofruesit e testeve serologjike. Besoj që shumë shpejt ato komuna, të cilat kanë shprehur gatishmëri dhe kanë mjete financiare do të fillojnë me testime serologjike”, tha ai.
Që nga shpërthimi i pandemisë më 13 mars, në Kosovë me koronavirus janë konfirmuar mbi 14 mijë persona, prej tyre mbi 10 mijë janë shëruar, ndërsa 563 kanë humbur betejën me sëmundjen e rrezikshme.
