Degradim i resurseve ujore, sipas Baton Begollit, po bëhet me “aprovim” nga institucionet e vendit. Kjo pasi, sipas Begollit, i cili është këshilltar në Këshillin ndërministror për ujëra, ato po japin leje e pëlqime ujore për veprim në resurse, në kundërshtim me ligjin dhe në dëm të resursit.

Këto veprime, sipas tij, do të sjellin pasoja të parikuperushme dhe alarmojnë për mungesë të ujit.

Begolli në një intervistë për “Kohën Ditore” ka thënë se Ministria ka çaluar në zbatimin e Ligjit për ujëra, pasi, sipas tij, janë lejuar ndërtimi i hidrocentraleve e i hurdhave të peshqve për qëllime komerciale me leje ujore, e që Ligji për ujëra parasheh që kjo të bëhet vetëm me koncesion.

Gjatë intervistës ai ka folur edhe për kapacitetet ujore që ka Kosova dhe dështimin për zhvillimin e resurseve të reja. Shqetësuese e ka parë edhe ndotjen e lumenjve nga ana e qytetarëve. Thotë se institucionet duhet t’i ngrenë kapacitetet e tyre inspektuese dhe të sjellin para drejtësisë ata që kanë lejuar veprimet në dëm të resurseve.

Këto ditë jemi dëshmitarë të një thatësie në ujëvarat e Mirushës. Çka do të thotë ndalja e ujit në këto ujëvara?

Begolli: Janë dy shkaktarë që mund të pakojnë ujërrjedhën në Mirushë. Një, është ndërtimi i një pende sipas rrjedhës së Mirushës e që fatkeqësisht nuk e kemi ditur as ne, por fatmirësisht nga iniciativat qytetare e kemi vërejtur. Ajo është bërë pa leje dhe për destinim të ujitjes që i ikën radarit tonë, pasi këto penda komunat ose Ministria e Bujqësisë i bënë pa bashkëpunim me Ministrinë përgjegjëse për resurse ujore e që nuk do të duhej.

Në anën tjetër, është fakti se jemi në një periudhë të thatësisë dhe mund të mashtrohemi me reshjet e fundit, por ato nuk e kthejnë mungesën e reshjeve mbi 2-vjeçare. Kemi kaluar në një periudhë të gjatë thatësie e që për një shtet si ne po ka ndikim dhe po shihet edhe në nivelin e liqeneve, qoftë edhe në nivelin e sasisë së ujërave në ujërrjedha të ndryshme, në rastin konkret edhe Mirusha.