Gjatë javës që vjen, mandatari për formimin e Qeverisë, Zoran Zaev pritet të dorëzojë propozimin për qeverinë e re të Maqedonisë Veriore, pas së cilës do të planifikohet seanca parlamentare për zgjedhjen e saj.
Konfirmim të saktë se kur kjo do të ndodhë nuk ka ende. Nga LSDM-ja thonë se Qeveria e udhëhequr prej tyre do të përbëhet nga një kuadër i ndershëm dhe i përgjegjshëm, të cilët në mandatin e tyre do të punojnë në zbatimin e programeve të planifikuara, dhe mbi të gjitha në rritjen dhe zhvillimin ekonomik.
“Zhvillimi i ri ekonomik i Maqedonisë është në vendin e parë të rendit të ditës së qeverisë së re, e cila do të sigurojë forcimin e standardit të të gjithë qytetarëve. Në katër vjetët e ardhshëm, do të vazhdojë rritja e pagave, investimi në vende të reja të punës, mbështetja e vazhdueshme e sektorit privat vendas dhe tërheqja e investimeve të huaja do të vazhdojnë. Qeveria e re vazhdon të investojë tek të rinjtë dhe në zhvillimin e ekuilibruar rajonal, e përkushtuar për t’u kujdesur për të gjithë qytetarët, veçanërisht më të varfrit,” thonë në LSDM.
VMRO-DPMNE nuk dha një përgjigje specifike në pyetjen e Alsatit, nëse do ta bojkotojnë seancën për zgjedhjen e një qeverie të re, siç bënë gjatë emërimit të Talat Xhaferit, si kryetar i Kuvendit. Por, kanë kritika të ashpra për koalicionin e ardhshëm.
“Unë thjesht do të shtoj se kjo është një qeveri jo-popullore, kriminale me kuadro të tranzicionit, e cila sigurisht nuk fiton besimin e VMRO-DPMNE, sepse është një nga qeveritë më kriminale me kuadrot më kriminale, me kuadrot e shterura të tranzicionit siç i ka Republika e Maqedonisë. Por, (për vendime të tjera) ju do të informoheni më tutje në ditën e votimit,” tha Dimçe Arsovski, zëdhënës i VMRO -DPMNE.
Sipas dispozitave, mandatari ka 20 ditë të paraqesë propozim në Parlament për përbërjen e qeverisë së re. Pastaj fillon periudha prej 15 ditësh në të cilën duhet të caktohet seanca e votimit, e cila nuk mund të zgjasë më shumë se dy ditë. Edhe nëse përdoren afatet maksimale të përcaktuara, Maqedonia Veriore duhet ta ketë Qeverinë e re, më së largu, deri më 20 shtator.
