Polonia do të ndërmarrë hapa javën e ardhshme për t’u tërhequr nga një traktat evropian mbi dhunën ndaj grave, që kabineti i krahut të djathtë thotë se shkel të drejtat e prindërve duke u kërkuar shkollave t’u mësojnë fëmijëve për gjininë, tha ministri i drejtësisë të shtunën.
Zbigniew Ziobro tha në një konferencë shtypi se ministria e tij do t’i paraqiste një kërkesë Ministrisë së Punës dhe Familjes të hënën për të filluar procesin e tërheqjes nga traktati, i njohur si Konventa e Stambollit.
“Ai përmban elemente të një natyre ideologjike, të cilat ne i konsiderojmë të dëmshme”, tha zoti Ziobro.
Partia në pushtet Drejtësi dhe Ligj (PiS) e Polonisë dhe partnerët e saj të koalicionit pozicionohen ngushtë me Kishën Katolike dhe promovojnë një axhendë konservatore sociale.
Qëndrimet e ashpra ndaj të drejtave të homoseksualëve ishte një nga çështjet kryesore të promovuara nga Presidenti Andrej Duda gjatë një fushate të suksesshme për rizgjedhje këtë muaj.
Të premten, mijëra njerëz, kryesisht gra, protestuan në Varshavë dhe qytete të tjera kundër propozimeve për të refuzuar traktatin.
“Qëllimi është të legalizohet dhuna në familje”, tha Marta Lempart, një nga organizatorët e protestës të Premten në një marshim në Varshavë. Disa protestues mbanin pankarta ku thuhej “PiS është ferri i grave”.
PiS ka shprehur shqetësime për një kohë të gjatë për Konventën e Stambollit, të cilën Polonia e ratifikoi kur drejtohej nga një qeveri centrististe në vitin 2015. Qeveria thotë se traktati është mosrespektues ndaj fesë dhe kërkon mësime të politikave shoqërore liberale në shkolla, megjithëse në të kaluarën nuk ka shkuar deri në tërheqjen nga traktati.
Ministri i drejtësisë, përfaqëson një parti më të vogël të krahut të djathtë brenda koalicionit qeverisës. Një zëdhënës i qeverisë nuk ishte i disponueshëm të shtunën për të komentuar nëse njoftimi i zotit Ziobro për planet për tu tërhequr nga traktati përfaqësonte një vendim kolektiv të kabinetit.
Organizata Botërore e Shëndetësisë thotë se dhuna në familje është rritur këtë vit në Evropë gjatë muajve të izolimit për shkak të përpjekjeve për të luftuar koronavirusin.
