Këshilli për Mbrojtjen e të Drejtave e të Lirive të Njeriut (KMDLNJ), i ka reaguar deputetëve të Listës Serbe, të cilët injoruan nderimin që Kuvendi i Kosovës iu bëri viktimave të Masakrës së Srebrenicës me një minutë heshtje.

Deputetët e kësaj liste lëshuan sallën e Kuvendit gjatë kohës së përkujtimit të viktimave të Masakrës së Srebrenices.

KMDLNJ përmes një reagimi thotë se mohimi dhe injorimi i respektit të viktimave civile të Masakrës së Srebrenices nga Lista Serbe është mohim i të gjitha viktimave civile gjatë luftës së fundit.

“Pandjeshmëri ndaj vuajtjeve dhe dhembjes që ende e ndjejnë familjet e viktimave dhe mosgatishmëri që përmes ballafaqimit me të kaluarën të ndërtohet një e tashme e pranuar nga të gjithë”.

KMDLNJ po ashtu thekson se mosdistancimi nga krimi është në fakt solidarizim me krimin.

“Këtë pikërisht po e demonstron Lista Serbe duke injoruar nderimin për viktimat civile të Masakrës së Srebrenicës”, thuhet në këtë reagim.