Kryetari i LDK-së në Prizren, Anton Quni, ka ftuar për raportim drejtorët që përfaqësojnë partinë e tij, në Ekzekutivin e Komunës së këtij qyteti.Takimi është mbajtur në zyrën e LDK-së.Drejtorët kanë treguar për punën që kanë bërë, sidomos gjatë kohës së COVID-19.

Përveç Qunit, në këtë takim kanë marrë pjesë edhe anëtarët e tjerë të partisë.

Sekretari i LDK-së në Prizren, Nderim Gashi tha se në këtë takim është vlerësuar puna e drejtorëve të këtij subjekti politik në Ekzekutivin e Komunës.“Puna e tyre është vlerësuar pozitive, sidomos në këtë kohë të pandemisë”, tha Gashi për “PrizrenPress”.

LDK-ja bashkëqeverisë me Lëvizjen Vetëvendosje në Prizren.

Partneriteti i këtyre dy subjekteve politike u pati luhatur pas zgjedhjes së kandidatit të PDK-së për Kryesues të Kuvendit.Kryetari i Komunës, Mytaher Haskuka, pati shpallur të prishur koalicionin me LDK-në.Pas arritjes së marrëveshjes së LDK-së dhe VV-së, për formimin e Qeverisë së Kurtit, nga Haskuka nuk është përmendur më prishja e koalicionit me këtë subjekt politik në Prizren.Nënkryetari i parë i Komunës dhe drejtorët e Ekzekutivit, kanë vazhduar t’i mbajnë postet e tyre.Ata kanë raportuar dje para përfaqësuesve të partisë për punën që po e bëjnë në Ekzekutiv.Kryetari i Degës, Anton Quni, pasi i ka falënderuar për punën që kanë bërë në Komunën e Prizrenit, ka kërkuar nga ata që vazhdojnë të angazhohen për të mirën e qytetarëve.“LDK-ja gjithmonë do t’i përkrahë qytetarët pa dallim”.Sekretari i degës së LDK-së, Nderim Gashi tha se në këtë takim është vendosur po ashtu që pas pandemisë të rifillohet me aktivitete politike në teren.