Virusi Corona tashmë në Kosovë ka marrë jetën e 16 personave, raporton Front Online.
Sot, në orët e hershme të mëngjesit është shënuar edhe viktima e fundit, një grua shtatzënë 40 vjeçe.
Ndërkaq, numri i të shëruarve në Kosovë ka arritur në 123.
Të infektuarit me Coronavirus, janë nga komunat e ndryshme të Kosovë, e 26 prej tyre janë nga komuna e Kamenicës.
Në një prononcim për portalin Front Online, nënkryetari i kësaj komune, Faton Jakupi, tha se në këtë komunë janë disa persona të dyshuar të cilët janë në vetizolim.
Ai tha se personave të dyshuar do t’iu bëhet testi për të vërtetuar nëse janë të prekur me Coronavirus.
“Po kemi hulumtuar kontaktet dhe ka akoma persona të dyshuar të cilët janë në vetizolim dhe presim qe t’iu bëhen testet”, deklaroi ai.
Jakupi tregoi edhe për gjendjen shëndetësore të 26 të infektuarve të cilët vijnë nga kjo komunë.
Ai tha se të infektuarit janë në gjendje të mirë shëndetësore, ku tre prej tyre po trajtohen në Klinikën Infektive.
“Gjendja shëndetësore është e mirë, nuk kanë ndonjë shqetësim. Në Klinikën Infektive po trajtohen tre persona, ndërsa tre të tjerë janë shëruar”, tha ai për Front Online.
